Ўзбекистонликлар қайси мамлакатларга кўпроқ саёҳат қилмоқда? Янги рейтинг эълон қилинди!

2025 йилнинг январь-апрель ойлари давомида хорижий давлатларга саёҳат қилган Ўзбекистон фуқароларининг сони кескин ошди. Миллий статистика қўмитаси томонидан тақдим этилган маълумотларга кўра, жорий йилнинг тўрт ойида жами 2 миллион 116 минг 900 нафар ҳамюртимиз туристик мақсадларда чет элга ташриф буюрган. Бу кўрсаткич ўтган йилнинг шу даврига нисбатан 404 минг 500 кишига ёки 23,6 фоизга ошганини кўрсатмоқда.

Туристларимизнинг саёҳат йўналишлари ўрганилганда, биринчи навбатда, қўшни давлатларга ташрифлар катта улушни ташкил этаётгани маълум бўлди. Бу мамлакатлар орасида Қирғизистон етакчиликни қўлга киритган бўлиб, январ-апрель ойларида у ерга 899 минг нафар Ўзбекистон фуқароси саёҳат қилган. Бу кўрсаткич умумий сафарларнинг деярли ярмини ташкил этади.

Иккинчи ўринда эса яна бир қўшни давлат – Тожикистон қайд этилган. У ерга шу муддат мобайнида 388 минг 400 киши бориб келган. Қозоғистон ҳам юртдошларимиз учун муҳим туристик масканлардан бирига айланиб улгурган: тўрт ойда 354 минг 900 киши ушбу мамлакатга ташриф буюрган.

Сўнгги йилларда диний сафарлар ва зиёрат туризмига қизиқиш кучайгани сабабли, Саудия Арабистони ҳам ўзбекистонликлар орасида машҳур йўналишлардан бири сифатида қайд этилмоқда. У ерга саёҳат қилган фуқароларимиз сони 133 минг 600 нафарга етган.

Анъанавий равишда Россия ва Туркия мамлакатлари ҳам ўзбек сайёҳлари орасида катта қизиқиш уйғотиб келмоқда. Россияга жорий йилнинг дастлабки тўрт ойида 93 минг 900 киши борган бўлса, Туркияни 64 минг 200 нафар фуқаро танлаган.

Шунингдек, сўнгги йилларда БААга ҳам ташрифлар сони сезиларли даражада ортган. Ушбу мамлакатга январь-апрель ойлари мобайнида 58 минг 800 нафар фуқаро ташриф буюрган. Араб сайёҳлик йўналишларидан яна бири бўлган Миср ҳам ўзининг тарихий ва маданий обидалари билан ҳамюртларимизни ўзига жалб қилган – ушбу мамлакатга 22 минг 400 нафар фуқаро саёҳат қилган.

Жанубий-Шарқий Осиё мамлакатлари орасида Таиланд ва Ветнам давлатлари ҳам ўзбек сайёҳлари эътиборини қозонган. Таиландга борганлар сони 15 минг 400 нафарни, Ветнамга эса 11 минг 400 нафарни ташкил этган. Бошқа давлатларга саёҳат қилган юртдошларимиз сони 74 минг 600 нафар бўлган.

Мутахассисларнинг фикрича, хорижга саёҳат қилувчи Ўзбекистонликлар сонининг бундай тез суръатлар билан кўпайиши мамлакатда турмуш даражасининг яхшиланиши, аҳоли даромадларининг ошиб бораётгани ва туризм соҳасидаги хизматлар сифати ортиши билан боғлиқ.

Шуни ҳам алоҳида қайд этиш лозимки, туризм соҳасидаги мутахассислар юртдошларимиз учун янги ва қизиқарли йўналишларни очишда фаол иш олиб бормоқда. Бу эса хорижга саёҳат қилувчилар сонининг келгуси йилларда ҳам янада кўпайишига сабаб бўлиши кутилмоқда.

Юқоридаги кўрсаткичлар Ўзбекистонликларнинг дунё мамлакатларига бўлган қизиқиши, саёҳат орқали янги маданиятлар билан танишиш истагининг кучайганини тасдиқлайди. Умуман олганда, бу жараён мамлакатимиз халқаро обрўсининг ортиши ва халқлар ўртасидаги маданий алоқаларнинг янада мустаҳкамланишига ижобий таъсир кўрсатади. «Замин»ни Telegram’да ўқинг!