Янгийўлда юз берган ҳалокат: Юк машинаси бола велосипедчини уриб кетди

Тошкент вилоятининг Янгийўл туманида ачинарли йўл-транспорт ҳодисаси содир бўлди. Байтиш маҳалласи ҳудудидан ўтган D-022 йўлида 5 июнь куни тахминан соат 11:30 да рўй берган ҳодиса кўпчиликни сергак бўлишга ундамоқда.

Расмий маълумотларга кўра, 1995 йилда туғилган ҳайдовчи К.Т “MAN TGS” русумли юк автомобилини бошқариб бораётган пайтда, йўлнинг ўнг томонидан чапга ўтаётган 2016 йилда туғилган велосипедчи — Ю.Э.ни кўрмай қолиб, уни уриб юборган. Натижада бола оғир тан жароҳатлари билан шифохонага ётқизилган.

Ҳозирда ушбу воқеа юзасидан Янгийўл тумани Ички ишлар бўлими ҳузуридаги Тергов бўлими томонидан суриштирув ишлари олиб борилмоқда. Ҳодиса сабаблари ва айбдорлик даражаси қонун доирасида аниқланади.

Эслатиб ўтамиз, велосипедчилар иштирокидаги йўл ҳодисалари сони сўнгги йилларда кўпайиб бормоқда. Мутахассислар болаларни йўл қоидаларига риоя қилишга ўргатиш, ота-оналарни эса фарзандларининг ҳаракат хавфсизлигига эътиборли бўлишга чақирмоқда.

Zamin.uz сайти воқеанинг ривожи, тергов натижалари ва мутасаддиларнинг изоҳлари билан яқиндан таништиришда давом этади. «Замин»ни Telegram’да ўқинг!