Ўзбекистонга келган сайёҳлар сони очиқланди

Ўзбекистон Миллий статистика қўмитаси жорий йилнинг январь—июль ойлари бўйича аҳамиятли рақамларни эълон қилди. Маълумотларга кўра, сўнгги етти ойда мамлакатга жами 6 миллион 319,1 минг нафар чет эл фуқароси ташриф буюрган. Бу кўрсаткич ўтган йилнинг шу даврига нисбатан қарийб 2,1 миллион нафарга кўпайгани ва 48,9 фоизлик ўсиш қайд этилганини англатади.

Ташриф буюрган меҳмонлар таркибига назар ташласак, асосий улуш қўшни давлатлар ҳиссасига тўғри келади. Хусусан:

• Қирғиз Республикасидан – 1 миллион 846 минг нафардан ортиқ;

• Қозоғистондан – 1 миллион 466 мингдан зиёд;

• Тожикистондан – 1 миллион 441 минг киши;

• Россиядан – 536 мингдан ортиқ;

• Афғонистондан – 267 минг киши;

• Туркманистондан – 208 мингдан зиёд меҳмон келган.

Шунингдек, Хитойдан – 103 минг, Туркиядан – 96 минг, Ҳиндистондан – 38 минг ва Корея Республикасидан 25 мингдан ортиқ фуқаро ташриф буюрган. Қолган давлатлар ҳиссаси эса қарийб 289 минг нафарни ташкил этган.

Сайёҳларнинг келиши мақсадларига кўра ҳам қизиқарли манзара юзага келган. Улардан катта қисми — 4 миллион 338 минг киши қариндошлари билан кўришиш учун келган. Шу билан бирга, 949 мингга яқин инсон тўлиқ сайёҳлик мақсадида Ўзбекистонни танлаган. Бундан ташқари:

• хизмат сафари билан – 710 мингдан зиёд киши;

• тижорат ишлари билан – 255 мингдан ортиқ;

• даволаниш учун – 54 минг нафар;

• ўқиш мақсадида эса – 10 мингдан ортиқ меҳмон ташриф буюрган.

Мутасаддиларнинг қайд этишича, Ўзбекистонда туризм соҳаси йилдан-йилга кенгайиб, мамлакат халқаро миқёсда кўпроқ сайёҳларни ўзига жалб қилаётгани билан аҳамиятли. Бу эса нафақат иқтисодий ривожланишга, балки мамлакат имижининг юксалишига ҳам катта ҳисса қўшмоқда.

Камола Шухратова

«ЗАМИН.УЗ» муҳаррири