Президент Шавкат Мирзиёев Хитой Халқ Республикаси раҳбари Си Жинпинг таклифи асосида расмий ташриф билан Тянцзин шаҳрига етиб борди. Давлат раҳбарига рафиқаси ҳам йўлдошлик қилди.
«Бинхай» халқаро аэропортида олий мартабали меҳмонни Хитой транспорт вазири Лю Вэй ҳамда қатор юқори лавозимли шахслар тантанали тарзда кутиб олди. Шу муносабат билан икки мамлакат байроқлари кўтарилди, фахрий қоровул сафга тизилди.
Ташриф дастурига кўра, Шавкат Мирзиёев 31 август – 1 сентябрь кунлари Шанхай ҳамкорлик ташкилоти Давлат раҳбарлари кенгашининг навбатдаги йиғилишида ва «ШҲТ плюс» форматида ўтадиган саммит сессияларида иштирок этади.
Бундан ташқари, президент Пекин шаҳрида Япониянинг Иккинчи жаҳон урушида мағлуб этилганига 80 йил тўлиши муносабати билан ташкил этиладиган тарихий ҳарбий парадда ҳам иштирок этади.
Мутахассислар фикрича, бу ташриф икки мамлакат муносабатларини янада мустаҳкамлайди ва минтақавий ҳамкорлик истиқболларига янги суръат бағишлайди.
