Ҳафта охиридаги об-ҳаво юртимиз аҳолиси учун қизиқ мавзулардан бирига айланди. Чунки ҳар бир киши ўз дам олишини режалаштиришда табиатнинг кайфиятига қараб қарор қабул қилади. “Ўзгидромет”нинг маълумотларига кўра, бу сафарги дам олиш кунлари айрим ҳудудларда ёмғир ва кучли шамол кузатилиши мумкин. Бу эса айримлар учун сюрприз, айримлар учун эса жиддий тайёргарликни талаб қилади.
Ҳафта давомида мамлакат бўйлаб ҳаво ҳарорати аста-секин кўтарилади. 19–21 сентябрь кунлари асосий ҳудудларда осмон бироз булутли бўлиб, ёғингарчилик кутилмайди. Бугун кундузги ҳарорат +25...+28 даража атрофида бўлиши кутилаётган бўлса, жанубий вилоятларда термометр кўрсаткичи +30 даражагача чиқиши мумкин.
Шанба куни чўл ҳудудлари ва юртимизнинг жанубий қисмида ҳаво янада исиб, кундузи +32...+34 даражагача етиши башорат қилинмоқда. Якшанба куни эса марказий ҳудудларда ҳам шунга яқин ҳарорат қайд этилиши мумкин.
Шу билан бирга, 20–21 сентябрь кунлари Қорақалпоғистон ва Хоразмнинг айрим туманларида қисқа муддатли ёмғир ва момақалдироқ кузатилиши эҳтимолдан холи эмас. Бу ҳудудларда кундузги ҳарорат нисбатан барқарор бўлиб, +23...+28 даража атрофида сақланиши кутилмоқда.
Шимолий ва чўл ҳудудларида шамол кучаяди. Айрим жойларда унинг тезлиги секундига 13–18 метргача етиши, чанг-тўзонлар кузатилиши мумкин. Бу эса йўлларда ҳаракатланаётган ҳайдовчилар учун ҳам қўшимча эҳтиёт чораларини талаб этади.
Пойтахт Тошкентда эса нисбатан барқарор ва қулай об-ҳаво кутилмоқда. Осмон бироз булутли бўлиб, ёмғир эҳтимоли йўқ. Шамол шарқдан секундига 3–8 метр тезликда эсади. Бугун пойтахтда ҳаво +26 даража бўлиши кутилаётган бўлса, эртага у +28...+30 даражага чиқади. Якшанба куни эса +32...+34 даражали илиқ ҳаво кузатилади.
«Замин»ни Telegram’да ўқинг!
