Бугун, 8 октябрь санасидан бошлаб пойтахтнинг бир нечта туманларида йўл ҳаракати вақтинча чекланади. Бу ҳақда Тошкент шаҳар Йўл ҳаракати хавфсизлиги бошқармаси расман маълум қилди.
Маълумотларга кўра, Мирзо Улуғбек ва Яшнобод туманлари ҳудудидан ўтувчи бир қатор асосий кўчаларда йўл таъмирлаш ишлари бошланган. Хусусан, Янги Ўзбекистон кўчасининг Оҳангарон шоссесидан D012 автомобиль йўлигача бўлган қисмида, шунингдек, Жасорат ҳамда Дўстлик кўчаларида автомобиль йўлининг юқори қатламига PSHMA-20 турдаги янги асфальт-бетон қопламаси ётқизилмоқда.
Шу муносабат билан мазкур ҳудудларда транспорт воситалари ҳаракати 8 октябрдан 20 октябргача вақтинча тўхтатилди. Йўл ҳаракати хавфсизлиги бошқармаси фуқароларни олдиндан ҳаракат йўналишларини режалаштиришга, шошилинч ҳолларда эса айланма йўллардан фойдаланишга чақирди.
Мутахассислар таъкидлашича, йўл таъмирлаш ишлари белгиланган муддат ичида якунига етказилади ва янгиланган йўл қатлами транспорт ҳаракати учун янада қулай ҳамда хавфсиз бўлади.
Йўл таъмири вақтида зарур техника ва қурилиш воситалари ишлатилиши сабабли айрим участкаларда тирбандликлар юзага келиши мумкин. Шу боис ҳайдовчилардан эҳтиёткорлик ва сабр-тоқат сўралди.
“Zamin”ни Telegram'да ўқинг!
