Ўзбекистон Республикаси Таълимни ривожлантириш республика илмий-методик марказида раҳбарият ўзгариши юз берди. Ушбу марказнинг янги раҳбари этиб Юлия Рисюкова тайинланди.
У бу лавозимда 2023 йил июн ойидан бери фаолият олиб борган Воҳид Ҳамидовни алмаштирди. Ҳамидов президент қарорига биноан лавозимидан озод этилди.
4 ноябр куни Президент Администрацияси раҳбари ўринбосари Хилола Умарова марказ жамоаси йиғилишида янги раҳбарни таништирди. Шунингдек, давлат раҳбари томонидан белгиланган устувор вазифалар ҳақида маълумот берди.
Умарова янги таълим лойиҳаларини тегишли ташкилотлар билан ҳамкорликда самарали амалга ошириш зарурлигини таъкидлади. Эслатиб ўтамиз, ушбу марказ президент ташаббуси билан 2023 йил апрел ойида ташкил этилган.
Марказ кенг ваколатларга эга бўлиб, таълим стандартлари, ўқув режалари ва дастурларини ишлаб чиқиш, шунингдек, мактабгача, умумий ўрта ва мактабдан ташқари таълим тизими учун ўқув-методик мажмуаларни нашр этиш билан шуғулланади.
Таълим ислоҳотлари доирасида Ўзбекистонда мактаб директорлиги лавозимига номзодлар учун махсус менежмент курслари жорий этилди.
Уларнинг тайинланиши Директорлар кенгаши тасдиғи орқали амалга оширилади. Бу ислоҳот таълим муассасаларида бошқарув малакасини оширишга қаратилган.
“Zamin”ни Telegram'да ўқинг!
