Бухоро 2025 йилда маданият ва санъат олами диққат марказига айланган шаҳарга айланди. 5 сентябрдан 20 ноябргача илк марта ўтказилган Халқаро санъат ва маданият биенналеси нафақат мамлакат, балки бутун жаҳон эътиборини ўзига қаратди.
Биеннале бошланишидан олдин ҳам Бухоро туризм борасида рекордлар қайд этишга улгурганди: 2025 йил мобайнида шаҳарга 2 миллион 250 мингдан зиёд чет эл меҳмонлари, шунингдек, 4 миллиондан ортиқ маҳаллий сайёҳлар ташриф буюрган. Ушбу йирик фестивалнинг старт олиши эса туристик оқимни янада кучайтириб, Бухорони жаҳон санъат ихлосмандлари учун тобора нуфузли маконга айлантирди.
Тадбирнинг ўзи давомида Бухоро тахминан 1 миллион 600 минг меҳмонни қарши олди. Улар орасида 770 мингдан зиёд хорижий сайёҳлар бўлгани биенналенинг халқаро даражада қай даражада қизиқиш уйғотганини яна бир бор тасдиқлайди.
Икки ойлик мазмунли биеннале нафақат маданий мулоқот ва бадиий тажриба алмашуви, балки сезиларли иқтисодий рағбат ҳам бўлди. Меҳмонлар оқими натижасида туризм хизматлари экспорти тахминан 210 миллион долларга етди — бу ўз навбатида Бухоро ва мамлакат туристик брендининг кучайишига янги суръат қўшди.
Қадимий цивилизация осори-атиқалари, тарихий шаҳар руҳи ва замонавий санъат инсталляциялари уйғунлашган мазкур биеннале ўзбек туризмида янги босқич бошланганини англатади.
Шубҳасиз, 2025 йилги Халқаро биеннале Бухорони дунё маданият харитасида янада равшан, янада таъсирчан тарзда намоён этди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
