Ижтимоий тармоқларда Ўзбекистонда “Электрон рецепт” тизими бекор қилиниши ҳақида тарқалган хабарлар кенг муҳокамаларга сабаб бўлди. Ушбу масала юзасидан Ўзбекистон Республикаси Соғлиқни сақлаш вазирлиги расмий муносабат билдириб, мазкур маълумотлар нотўғри талқин қилинаётганини маълум қилди.
Вазирлик изоҳига кўра, 2025 йил 15 декабрда қабул қилинган тегишли буйруқда “Электрон рецепт” тизимини бекор қилиш эмас, аксинча уни босқичма-босқич кенгайтириш кўзда тутилган. Хусусан, дастлабки босқичда тизимли таъсирга эга антибиотиклар, синтетик антибактериал воситалар ҳамда гормонал препаратлар учун электрон рецепт мажбурий этиб белгиланган.
Янги ишлаб чиқилган ҳужжат лойиҳасида эса ушбу тизимни янада такомиллаштириш мақсадида Тошкент шаҳри ҳамда тажриба-синов ўтказилаётган 15 та ҳудуддаги барча тиббиёт муассасалари ва дорихоналарда рецепт асосида бериладиган дори воситаларини тўлиқ электрон шаклга ўтказиш режалаштирилмоқда.
Шу билан бирга, айрим тоифадаги кучли таъсир қилувчи дори воситалари, таркибида гиёҳвандлик ёки психотроп моддалар мавжуд препаратлар, шунингдек реимбурсация (давлат томонидан қоплаб бериладиган) дастурлар билан боғлиқ жараёнлар ушбу тизимдан мустасно этилиши қайд этилган.
Мутахассислар фикрича, “Электрон рецепт” тизимини жорий этиш дори воситалари айланмасини назорат қилишни кучайтириш, ноқонуний савдони камайтириш ҳамда тиббий хизматлар шаффофлигини оширишга хизмат қилади.
“Zamin”ни Telegram'да ўқинг!
