Пойтахтда ёзги мавсум яқинлашиши билан жамоат транспортидаги қулайлик масаласи яна кун тартибига чиқди. Йўловчиларнинг кўплаб мурожаат ва шикоятларидан сўнг “Тошшаҳартрансхизмат” акциядорлик жамияти автобусларда кондиционерлардан мажбурий фойдаланиш бўйича янги тартибни жорий этмоқда.
Маълум қилинишича, 7 майдан бошлаб Тошкент шаҳрида ҳаракатланувчи автобусларда совитиш тизимлари белгиланган талаблар асосида ишлаши шарт бўлади.
Амалдаги регламентга кўра, ташқи ҳаво ҳарорати +28 даражадан ошганда автобуслардаги кондиционерлар автоматик тарзда ёқилиши керак. Шу билан бирга, салон ичидаги ҳарорат йўловчилар учун қулай бўлган +26 даража атрофида сақланиши лозим.
Масъуллар таъкидлашича, янги тартиб жамоат транспортида аҳоли учун янада қулай муҳит яратиш мақсадида жорий қилинмоқда. Айниқса, ёзнинг иссиқ кунларида автобусларда ҳаво айланиши ва салқинликни таъминлаш муҳим вазифалардан бири ҳисобланади.
Шу муносабат билан бир қатор қатъий чоралар ҳам белгиланди. Хусусан, кондиционер тизими ишламайдиган ёки носоз ҳолатдаги автобусларни йўналишга чиқариш тақиқланади.
Бундан ташқари, автобус паркларида техник аудит ишлари кучайтирилмоқда. Совитиш тизимларида аниқланган барча носозликларни қисқа муддатда бартараф этиш вазифаси қўйилган.
Назорат ишлари ҳам кучайтирилмоқда. “Йўловчи ташиш мониторинги ва назорати” давлат муассасаси томонидан мунтазам текширувлар ўтказилади. Талабларга амал қилмаган ҳайдовчилар ва масъул ходимларга нисбатан интизомий чоралар қўлланиши айтилди.
Шунингдек, ҳайдовчилар учун кондиционер ва иқлим ускуналаридан тўғри фойдаланиш бўйича навбатдан ташқари йўриқномалар ташкил этилган.
Тошкентликлар эса бу янгиликни ижобий қабул қилмоқда. Ижтимоий тармоқларда кўпчилик жамоат транспортидаги иссиқ ва дим муҳитдан шикоят қилиб келаётган эди. Энди эса йўловчилар автобусларда анча қулай ва салқин муҳитда ҳаракатланиш имконига эга бўлиши кутилмоқда.
“Zamin”ни Telegram'да ўқинг!
