Президент Шавкат Мирзиёев 8 май куни Иккинчи жаҳон уруши қатнашчилари ва меҳнат фронти фахрийларини зиёрат қилиб, уларни байрам билан самимий табриклади. Бу учрашув нафақат расмий тадбир, балки авлодлар ўртасидаги ҳурмат, миннатдорлик ва тарихий хотира ифодаси сифатида ҳам катта маънавий аҳамият касб этди.
Давлатимиз раҳбари Қуролли Кучлар Бош ҳарбий клиник госпиталида Акмал ота Акрамов, Вера Журавская, Ҳасанбой ота Халматов ва Владимир Алексейков билан дилдан суҳбатлашди. Президент нуронийларнинг ҳол-аҳволи, саломатлиги, кайфияти билан қизиқиб, уларнинг оғир, синовли ва ибратли ҳаёт йўлини алоҳида эътироф этди.
Учрашув давомида уруш йилларида ва меҳнат фронтида кўрсатилган матонат, сабр-бардош ва фидокорлик халқимиз хотирасида абадий сақланиши таъкидланди. Зеро, бугунги тинч ва осойишта кунлар, фарзандларимиз ва набираларимизнинг эркин ҳаёти айнан ана шундай жасоратли инсонларнинг меҳнати, мардлиги ва сабри эвазига барпо бўлган.
– Сизлар тарихнинг жонли гувоҳи, матонат тимсолисизлар. Сиздек табаррук инсонлар билан учрашиш, ўгитларингизни тинглаш бизга катта маънавий куч бағишлайди. Халқимиз сизлар билан ҳақли равишда фахрланади. Бугунги тинч ва озод кунлар, авлодларнинг бахтиёр истиқболи сизларнинг мислсиз фидокорлигингиз маҳсулидир. Сизларнинг ибратли ҳаёт йўлингиз ёшларимиз учун ҳақиқий матонат мактабидир, – деди Президент.
Президентнинг жорий йил 16 апрелдаги қарорига мувофиқ, мамлакатимизда уруш ва меҳнат фахрийларига юксак эҳтиром кўрсатилмоқда. Бу бежиз эмас. Чунки халқ ўз тарихини, ўз қаҳрамонларини унутмаса, келажакка ҳам ишонч билан қадам ташлайди. Хотира бор жойда қадр бор, қадр бор жойда эса маънавий куч бор.
Иккинчи жаҳон уруши қатнашчилари, фронт орти фахрийлари, шунингдек, мустақиллик йилларида хизмат бурчини бажариш чоғида ҳалок бўлган ҳарбий хизматчиларнинг оила аъзолари давлатнинг доимий эътибор ва ғамхўрлигида экани таъкидланди. Уларга моддий ва маънавий кўмак кўрсатиш билан бирга, саломатликларини тиклаш учун республикамизнинг энг яхши санаторийларига имтиёзли йўлланмалар ажратилган.
– Яратган сизларга ватанпарварлик ва фидокорона меҳнатингиз мукофоти сифатида узоқ умр, эл-юрт ардоғида яшаш бахтини ато этган. Сизларнинг дуоларингиз юртимиз учун омонлик, ишларимизга баракадир, – деди Президентимиз.
Учрашувда нуронийлар ҳам мамлакатимизда тарихий хотирани тиклаш, кексаларни эъзозлаш, фахрийларга муносиб ҳурмат кўрсатиш борасида амалга оширилаётган ишлар учун давлатимиз раҳбарига миннатдорлик билдирди. Уларнинг самимий дуолари, ҳаётдан розилиги ва ёшларга қарата айтган ўгитлари учрашувга янада илиқлик бағишлади.
Бундай мулоқотлар жамият учун жуда муҳим. Чунки фахрийлар — китоблардаги тарих эмас, кўз ўнгимизда турган тирик ибрат мактабидир. Улар кўрган қийинчилик, улар чеккан машаққат ва улар сақлаб қолган тинчлик бугунги авлод учун катта сабоқдир.
Энг муҳими, бу учрашув яна бир ҳақиқатни эслатди: тинчлик ўз-ўзидан келмаган, осойишта ҳаёт эса бебаҳо неъмат. Уни асраш, қадрига етиш ва келажак авлодларга етказиш ҳар биримизнинг бурчимиздир.
“Zamin”ни Telegram'да ўқинг!
