Ўзбекистонда автомобилларни техник кўрикдан ўтказиш тартиби соддалаштирилди. Бу борадаги янгиликлар Президентнинг “Автотранспорт воситаларидан фойдаланишда аҳолига қўшимча қулайликлар яратиш чора-тадбирлари тўғрисида”ги қарорида баён этилган.
Унга кўра, эндиликда ишлаб чиқарилганига 10 йил бўлмаган енгил автомобиллар техник кўрикдан ихтиёрий асосда ўтказилади. Яъни, бундай машина эгалари хоҳласа – текширтиради, хоҳламаса – йўқ.
Аммо автомобил 11 йилдан ошган бўлса, техник ҳолати мажбурий назоратдан ўтказилади. Бу ҳолатда техник кўрик қуйидагича амалга оширилади:
- 11 йилдан 14 йилгача бўлган автомобиллар – ҳар 2 йилда бир марта текширилади.
- 15 йил ва ундан ортиқ автомобиллар – ҳар йили бир марта техник кўрикдан ўтказилади.
Бу тартиб фақат оддий жисмоний шахсларга тегишли енгил автомобиллар учун амал қилади. Тижорат мақсадида — йўловчи ташиш учун ишлатиладиган автомобиллар эса ушбу рўйхатдан мустасно бўлиб, улар алоҳида тартибда текширилади.
Янги қарор автомобил эгалари учун қулайлик яратади. Шу орқали бюрократик тўсиқлар камайиб, хизмат кўрсатиш тизими янада енгиллашиши кутилмоқда. Мутахассислар эса техник кўрикни ўтказиш – машина эгасининг хавфсизлиги учун муҳим, деб эслатмоқда.
«Замин»ни Telegram’да ўқинг!
