Хитойда нарх уруши сабаб BYD фойдаси 55 фоизга тушиб кетди

Хитойнинг BYD автоишлаб чиқарувчиси 2026 йилнинг биринчи чораги якунларига кўра фойданинг кескин пасайганини маълум қилди. Компаниянинг соф фойдаси ўтган йилга нисбатан 55,4 фоизга тушиб, 4,09 миллиард юанни ташкил этди. Бу ҳақда Ixbt.com хабар беради.

Бу 2020 йилдан бери энг йирик чораклик пасайиш ҳисобланади.

Даромад ҳажми ҳам қарийб 12 фоизга камайиб, 150,2 миллиард юанга тушган. BYD асосан ички бозорда қийинчиликларга дуч келмоқда.

Арзон электромобиллар ҳисобига етакчига айланган компания эндиликда агрессив нархлар жанги ва солиқ имтиёзларининг қисқариши таъсирини сезмоқда.

Ҳисобот даврида компания 700 463 та электрлаштирилган автомобиль сотган. Бу ўтган йилнинг мос даврига нисбатан 30 фоизга кам.

Ички бозордаги пасайиш фонида BYD халқаро экспортни кучайтирмоқда ва қимматроқ сегментга ўтишга ҳаракат қилмоқда.

Пекин автосалонида компания янги моделларни, жумладан, 250 минг юандан бошланадиган Датанг йўлтанламасини тақдим этди. Ушбу модель биринчи куннинг ўзида 30 мингдан ортиқ буюртма йиғишга муваффақ бўлди.

Nodirbek Razzokov

«ZAMIN.UZ» муҳаррири

+ Zamin.uz сайтини Googleга қўшинг