Май ойи бошида 400 га яқин россиялик аскар Украина шарқидаги дарёни кечиб ўтишга уринаётиб ҳалок бўлган

^{Фото: Shutterstock}
The New York Times газетасининг Украина ҳарбийларига таяниб ёзишича, 8 май куни Северский Донец дарёсини кечиб ўтишга уриниш чоғида 400 га яқин россиялик ҳарбий ҳалок бўлган.

Украина Қуролли Кучлари вакилларининг нашр мухбирига маълум қилишича, россиялик ҳарбийлар Северодонецк туманидаги Украина қўшинларини ўраб олиш учун Белогоровка яқинида Северский Донец дарёсидан кечиб ўтишга уринган. Бироқ аксинча, рус ҳарбий хизматчиларининг ўзлари қуршовда қолган — бу эса уларни дарёнинг жанубий қирғоғига ўтишга мажбур қилган, кейин улар кучли артиллериядан ўт очишган ва дарё ўзанига миналар отиб ўтиш жойларини портлатган ва чекиниш йўлини беркитиб қўйишган.

Жанг жойига ташриф буюрган NYT мухбирига украиналик ҳарбийлар ишдан чиққан рус техникаларини (камида 15 та зирҳли техника) кўрсатган, шунингдек, газетанинг ёзишича, ўрмоннинг бир қисмидаги «дарахтларда россияликлар кийимларининг бўлаклари осилиб ётар» ва «чириган жасадларнинг ҳидига чидаб бўлмасди».

Украина қуролли кучлари полковниги Дмитрий Кашенконинг NYT мухбирига айтишича, украиналик ҳарбийлар овоз кучайтиргичлар орқали россияликларга таслим бўлишни таклиф қилган, бироқ улар бу чақириқларни эшитгани аниқ эмас. Унинг сўзларига кўра, баъзи рус аскарлари дарё бўйлаб қарама-қарши йўналишда сузиб ўтиб, қамалдан чиқиб кетишга муваффақ бўлган.

Кўп ўтмай Россия қўшинлари портлатилган ўтиш жойларини қайта тиклаган ва яна Северский Донeцни кесиб ўтишга уринган, аммо уларни мудофаани ўз қўлига олган Украина кучлари кутиб олган.

NYT маълумотларига кўра, Белогоровкада содир бўлган ушбу воқеа Россиянинг Украинага босқини бошланганидан бери рус қўшинлари кўрган энг катта йўқотишлардан бири бўлди.

Белогоровка ҳудудидаги Северский Донец дарёсини кечиб ўтиш чоғида рус қўшинларининг йирик йўқотишларга учрагани аввалроқ маълум бўлган эди Хусусан, Meduza бу ҳақда Донбассдаги уруш зонасида содир бўлаётган воқеаларни шарҳида ёзган, бироқ қурбонлар сони ҳақида аввал хабар берилмаган.

Шу билан бирга Meduza уруш шароитида низо томонларидан келаётган маълумотларни тезда текширишнинг имкони йўқлигини қайд этган.

NYT мақоласини эса Эндрю Крамер ёзган, у 2017 йилда бошқа журналистлар қатори Россия билан боғлиқ қатор тадқиқотлари учун Пулитцер мукофотини олган. Мукофот ҳакамларининг қарори ўша пайтда россиялик журналистларда саволларга сабаб бўлганди. “Замин” янгиликларини “Одноклассники”да кузатиб боринг