Жо Байден Трамп ва унинг тарафдорларини «мамлакатга таҳдид» деб атади

^{Фото: Kevin Lamarque / Reuters / Scanpix / LETA}
АҚШ президенти Жо Байден америкаликларга мурожаатида ўзидан олдинги президент Доналд Трамп ва унинг тарафдорларини «мамлакатга таҳдид» деб атади.

«Доналд Трамп ва MAGA республикачилар республикамиз пойдеворига таҳдид солувчи экстремизмни ифодалайди», деди у.

Байденнинг сўзларига кўра, Трамп тарафдорлари «конституцияни ҳурмат қилмайди ва қонун устуворлигига ишонмайди», 2020 йилги президентлик сайлови натижаларини тан олмайди, шунингдек, мамлакатни «танлаш ҳуқуқи йўқ бўлган» ўтмишга қайтаришга ҳаракат қилмоқда.

АҚШ президенти, шунингдек, Трамп тарафдорлари орасида жамоат арбоблари оммавий тартибсизликларга чақиришаётганини айтди. «Америкада сиёсий зўравонликка ўрин йўқ. Нуқта», деди у.

Байден бу барча республикачиларга тааллуқли эмаслигини таъкидлади, бироқ Трамп ва унинг тарафдорлари Республикачилар партиясида ҳукмронлик қилишини ва уни «қўрқитиб қўйгани»ни айтди.

Республикачилар партияси президентни нутқи учун танқид қилиб, уни жамиятга низо келтириб чиқаришда айблади.

Politico Байденнинг нутқини унинг президентлиги давридаги энг кескинларидан бири деб атади. Нашр ушбу нутқни ноябрь ойида бўлиб ўтадиган Конгрессга сайловларда «ставкаларни аниқлаш»га уриниш сифатида талқин қилди. The New York Times газетасининг ёзишича, Байден жамоаси сайловни амалдаги президент дастури ва Трамп тарафдорларининг «экстремизми» ўртасидаги «ҳаётий танлов» сифатида тақдим этмоқчи.

АҚШнинг собиқ президенти Доналд Трамп Америка сиёсатидаги энг қудратли шахс бўлиб қолмоқда; унинг қўллаб-қувватлаши, Америка оммавий ахборот воситаларига кўра, республикачилар праймеризларида номзодлар учун ҳали ҳам ҳал қилувчи аҳамиятга эга. Сўнгги ҳафталарда Трампнинг номи ФҚБ унинг уйида ўтказган тинтувлари ва эҳтимолий жиноий таъқиблар туфайли кўплаб хабарларда пайдо бўлди.

Янгиликлар