Полша Германиядан 1,3 трлн евро товон пули ундириш учун Исроилни жалб этмоқчи

^{Фото: Jedrzej Nowicki / DER SPIEGEL}
Полша Германия ҳукумати билан Иккинчи жаҳон урушидаги йўқотишлар учун товон пули ундириш бўйича музокараларга Исроилни жалб этмоқчи. Бу ҳақда Полша бош вазири Матеуш Моравецкий маълум қилди.

"Биз Берлинда музокаралар ўтказмоқчимиз ҳамда бунга Исроил вакилларини ҳам таклиф қилмоқчимиз – зеро полшалик қурбонларнинг ярми келиб чиқиши яҳудий бўлган фуқаролар", — деди Моравецкий Spiegel нашрига берган интервюсида.

Моравецкий Полша кейинчалик халқаро судларга ҳам мурожаат қилиши мумкинлигини айтди.

Аввалроқ Полша Иккинчи жаҳон урушида етказилган зарар учун Германиядан ундириладиган репарацияни 1,3 триллион евро деб баҳолаганди.

Берлин Полшанинг репарация тўғрисидаги талабини бир неча марта рад этган. ГФР ҳукуматининг таъкидлашича, Полша 1953 йилда Германияга нисбатан талабидан воз кечган ва буни бир неча марта тасдиқлаган. “Замин” янгиликларини “Telegram”да кузатиб боринг