Фото: Виктор Антонюк
Қўшма Штатлар «Вагнер» хусусий ҳарбий компанияси (ХҲК)ни Марказий Африка Республикаси, Мали, Судан ва бошқа ҳудудларнинг табиий ресурсларидан Россия ҳарбий операцияларини молиялаштириш учун фойдаланганликда айблади. Бу борада 6 октябр, пайшанба куни АҚШнинг БМТдаги элчиси Линда Томас-Гринфилд баёнот берди.
Унинг сўзларига кўра, «ноқонуний даромадлар Москванинг Африка, Яқин Шарқ ва Украинадаги ҳарбий машинасини молиялаштиришга сарфланмоқда». Томас-Гринфилд БМТ Хавфсизлик кенгашининг Африкадаги ноқонуний савдо орқали қуролли гуруҳлар ва террорчиларни молиялаштиришга қарши қаратилган йиғилишида: «Хато қилманг: Африка бўйлаб одамлар Вагнер гуруҳининг эксплуатацион амалиётлари ва инсон ҳуқуқларини поймол қилишлари учун катта нарх тўламоқдалар», деди.
Россиянинг БМТ Хавфсизлик кенгашидаги доимий вакили Василий Небензя бунга жавобан АҚШ вакили «Россиянинг африкалик ҳамкорларни қўллаб-қувватлаши» масаласини кўтарганидан афсусда эканини айтди. «Бу уларнинг ҳақиқий режалари ва мақсадларини очиб беради - улар Африка давлатларидан ҳақиқатан ҳам нимагадир муҳтож», - дея Небензя сўзларини келтирган Reuters.
«Вагнер» хусусий ҳарбий компанияси жангарилари Сурия, Ливия, Украина ва Марказий Африкада кузатилган. ХҲКнинг ёлланма аскарлари кўп йиллар давомида Кремль томонидаги турли қуролли тўқнашувларда яширин иштирок этганликда гумон қилинган.
Москва ҳар доим хусусий ҳарбийлаштирилган гуруҳлар билан алоқаларини рад этиб келади. Шу билан бирга, Россия президенти Владимир Путин билан яқин алоқадор ҳисобланган россиялик тадбиркор Евгений Пригожин сентябр охирида «Вагнер» ХҲК асосчиси эканлигини тан олди. Унинг сўзларига кўра, 2014 йилнинг май ойида Донбасс айирмачиларини қўллаб-қувватлаш учун ҳарбийлаштирилган тузилмани яратган.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
