Миллиардер Николай Сторонский Россия фуқаролигидан воз кечди

^{Фото: Reuters}
Влад Яценко билан бирга Revolut банк сервисига асос солган бизнесмен Николай Сторонский Россия фуқаролигидан воз кечди. Бу ҳақда Британиянинг The Telegraph нашри Revolut вакилларига таяниб хабар берди. Шунингдек, Сторонский Россия фуқаролигидан бош тортганини Revolut Forbes журналистларига ҳам тасдиқлаган.

Компания вакиллари айтишича, Сторонский Россия фуқаролигидан «шу йил аввалроқ» чиққан. Revolut бундай қарор сабабларига тўхталиб ўтирмади, фақат «Ник — Буюк Британия фуқароси» эканини маълум қилди.

Шу билан бирга, The Telegraph ёзишича, Revolut вакиллари Сторонскийнинг РФ фуқаролигидан воз кечиши Украинадаги уруш билан боғлиқлигини билдирган ҳолда, бизнесмен «қатъиян жанговар ҳаракатларни зудлик билан тўхтатишга чақириши»ни таъкидлаган.

Forbes эслатишича, Украина Николай Сторонскийнинг отаси — «Газпром промгаз» АЖ бош директорига қарши санкциялар киритган.

Николай Сторонский украиналик Влад Яценко билан биргаликда 2015 йилда Буюк Британияда Revolut банк сервисини ишга туширганди.

Компания Россия Украинага бостириб кириши туфайли Евроиттифоқ томонидан жорий қилинган санкцияларнинг барчасига риоя этишини, шу жумладан, Россиядан пул ўтказмаларини қўллаб-қувватламаслигини маълум қилган.

Сторонский 2022 йилда Forbes’нинг энг бой россиялик бизнесменлар рейтингига киритилган. Унинг давлати 7,1 миллиард долларга баҳоланиб, 16-ўринга лойиқ деб топилган. “Замин” янгиликларини “Telegram”да кузатиб боринг