07:00 / 04.11.2022

«Мен буни яна қиламан»: Трамп 2024 йилда Оқ уйга қайтишига шама қилди

^{Фото: Getty Images}
АҚШ собиқ президенти Доналд Трамп Оқ уйга қайтишга шама қилди. Сиёсатчи Республикачилар партияси бу йилги оралиқ сайловларда ғалаба қозонишини кутмоқда.

Sky News маълумотларига кўра, демократларнинг сайловдаги умидлари сайловчиларнинг юқори инфляциядан қўрқиши туфайли пучга чиқди, Жо Байденнинг рейтинги эса 50 фоиздан пастга тушди. Шу билан бирга, мухолифат партиялар ҳам оралиқ сайловларда тарихий натижаларни кутмоқда.

Сўровлар шуни кўрсатадики, республикачилар АҚШ Вакиллар палатаси ва эҳтимол Сенат устидан назоратни ўз қўлига олиши мумкин, бу уларга Байденнинг кейинги икки йил давомидаги ташаббусларини блоклаш имконини беради.

«Энди эса мамлакатимизни муваффақиятли, хавфсиз ва улуғвор қилиш учун буни жуда, жуда, жуда катта эҳтимол билан яна қиламан. Тайёр туринг, яна таъкидлайман, тез орада. Тайёр туринг», - деди Трамп бу воқеалар фонида.

Reuters манбаси ҳам Трамп 2024 йилдаги сайловда ўз номзодини қўйиши мумкинлигини тахмин қилди. Шу билан бирга, сиёсатчи республикачилар орасида ихтилоф келтириб чиқарувчи шахс сифатида қолмоқда.

Айни дамда Трамп устидан бир қатор текширувлар бошланган, жумладан, лавозимидан кетганидан кейин Оқ уйдан олиб чиққан махфий ҳужжатлар бўйича, уларнинг баъзилари ҳали топилмаган. Ўтган ойда ўтказилган сўров шуни кўрсатдики, америкаликларнинг атиги 41 фоизи у ҳақида ижобий фикрда.

Қайд этилишича, республикачилар орасидаги бир қатор юқори мартабали сиёсатчилар 2024 йилда президентликка номзодини қўйиш имкониятини кўриб чиқмоқда. Эҳтимолий номзодлар сифатида Флорида губернатори Рон ДеСантис, Виржиния губернатори Гленн Янгкин ва Трампнинг собиқ вице-президенти Майк Пенс кўрсатилган.

Қўшма Штатлардаги оралиқ сайловлар президентнинг тўрт йиллик муддати ўртасида, ноябрь ойида ўтказиладиган умумий сайловдир. Оралиқ сайловлар давомида АҚШ Вакиллар палатасининг барча 435 ўрни ва АҚШ Сенатидаги 100 ўриндан 33 ёки 34 тасига номзодлар сайланади.

Оралиқ сайловлар 8 ноябрь кунига белгиланган.