Қозоғистон ИИВ Остонадаги митингда 300 киши иштирок этганини маълум қилди

^{Фото:Tengrinews}
Қозоғистон президенти Қосим-Жўмарт Тўқаевнинг инаугурацияси куни Остона шаҳрида рухсат этилмаган митинг бўлиб ўтди. Қозоғистон Ички ишлар вазирлиги маълумотларига кўра, унда 300 киши иштирок этган.

Қозоғистон ИИВ хабарига кўра, Остонадаги тунги клублардан бирида ёшлар учун оммавий маданий тадбир ташкил этилганидан кейин митинг бошланиб кетган. Тадбир ташкилотчиси ишбилармон бўлган.

«Оммавий-маданий тадбирда 300 нафар ёшлар иштирок этди. Ташкилотчи тадбир чоғида йиғилганларга атайлаб ёлғон маълумот етказиб, шахсий ноқонуний мақсадига эришиш учун ноқонуний намойишга чақирган. Бу билан тинч намойиш ўтказишнинг қонун ҳужжатларида белгиланган тартибини бузган», дейилади Қозоғистон ИИВ хабарида.

Полиция намойишчиларнинг бир қисми ушланганини айтмоқда.

«Иштирокчилар полициянинг ноқонуний ҳаракатни тўхтатиш ҳақидаги талабига ҳеч қандай муносабат билдирмади. Ташкилотчи овоз кучайтиргич ёрдамида одамларни гижгижлаб, қонун ва тартибни бузишда давом этди. Шаҳар аҳолиси хавфсизлигини таъминлаш мақсадида ИИВ ходимлари ноқонуний хатти-ҳаракатларга чек қўйиш чораларини кўришга мажбур бўлди. Шу билан бирга, ноқонуний намойиш иштирокчилари ИИВ ходимларига жисмоний қаршилик кўрсатди. Ҳозирда айбдорлар аниқланди ва полицияга олиб кетилди. Уларнинг ҳаракатларига белгиланган тартибда ҳуқуқий баҳо берилади», дейилади хабарда.

Ҳибсга олинганлар акс этган видеоларни тарқатган Orda.kz порталига кўра, намойишчилар тадбиркор Марат Абиевнинг «Келажак меъморлари» лойиҳаси издошлари бўлган.

Тадбиркор Марат Абиев ўзини қишлоқ хўжалигини ривожлантириш билан шуғулланувчи «TDFA фонди асосчиси» деб атайди. Тадбиркорнинг сўзларига кўра, унинг жамғармаси Қозоғистонни «дунё миқёсидаги очарчилик таҳдидидан» қутқаради. Унинг корхонаси хориждан уруғ келтириб, Қозоғистонда етиштиради.

2022 йил май ойида тадбиркор Марат Абиевнинг вилоятлардаги юзлаб тарафдорлари «концертда қатнашиш» учун Остонага автобусларда етиб боришга ҳаракат қилишган, бироқ Қозоғистон полицияси автобусларни орқага қайтарган эди.

Остона шаҳри маъмуриятининг таъкидлашича, «Концерт ўтказиш рад этилгани ҳақида расмий хабар берилганига қарамай, Марат Абиев одамларни алдаш йўли билан концертга таклиф қилишда давом этган ва шу орқали одамларни чалғитган».

Кейинчалик, Марат Абиев ўз тарафдорлари қонунни бузмоқчи эмаслигини ва сиёсат билан шуғулланмоқчи эмаслигини айтган эди. “Замин” янгиликларини “Telegram”да кузатиб боринг