Россия президенти Владимир Путин 29 май куни Қозоғистон пойтахти Остона шаҳрида ўтказилган Евросиё иқтисодий иттифоқи саммити якунлари бўйича матбуот анжуманида иштирок этди. Кремль раҳбари ўз чиқишида ЕОИИ доирасидаги ҳамкорлик, миллий валюталардаги ҳисоб-китоблар ва Арманистоннинг ташқи сиёсий йўналиши ҳақида фикр билдирди.
Путиннинг таъкидлашича, Россия учун Евросиё иқтисодий иттифоқига аъзо давлатлар билан иттифоқчилик алоқаларини чуқурлаштириш устувор вазифалардан бири бўлиб қолади. У ЕОИИ доирасида товарлар, хизматлар, капитал ва ишчи кучининг умумий бозорлари шаклланганини қайд этди. Россия президентининг сўзларига кўра, ўтган йили иттифоқ мамлакатлари ўртасидаги товар айирбошлаш ҳажми 95 миллиард долларга етган.
Шунингдек, Путин ЕОИИ мамлакатлари ўртасидаги ҳисоб-китобларнинг қарийб барчаси миллий валюталарда амалга оширилаётганини таъкидлади. Унинг фикрича, ташкилотга аъзо давлатлар асосий озиқ-овқат маҳсулотлари бўйича ўзини мустақил таъминлашга интилаётгани ҳам муҳим иқтисодий йўналишлардан бири ҳисобланади.
Матбуот анжуманида Россия раҳбари Арманистон масаласига ҳам алоҳида тўхталди. У Россия ва Арманистон ўртасида “алоҳида муносабатлар” мавжудлигини айтиб, Ереван Ғарб билан яқинлашиш бўйича қандай қарор қабул қилмасин, бу алоқаларни бутунлай бузмаслигини билдирди. Бироқ Путин Евросиё иқтисодий иттифоқи доирасида гап биринчи навбатда иқтисодий манфаатлар ҳақида кетаётганини урғулади.
Унинг таъкидлашича, агар Арманистон Европа Иттифоқи стандартларига ўтишни бошласа, Россия ва ЕОИИ доирасидаги иқтисодий интеграция масалалари қайта кўриб чиқилиши мумкин. Путин бу ҳолатда Арманистон маҳсулотлари, жумладан, вино экспорти, темирйўл тарифлари, энергия нархлари ва Россияда ишлайдиган Арманистон фуқаролари мақомига таъсир бўлиши мумкинлигини айтди.
Россия президенти Украинадаги инқирозни ҳам эслаб, унинг бошланишини Киевнинг Европа Иттифоқи билан яқинлашиш ҳаракатлари билан боғлади. Шу билан бирга, у Евросиё иттифоқи Арманистондан аъзолик бўйича референдумни имкон қадар тезроқ ўтказишни сўраётганини билдирди.
Эслатиб ўтамиз, Арманистон бош вазири Никол Пашинян Остонадаги ЕОИИ саммитида иштирок этмади. Аввалроқ Ереван Европа Иттифоқи билан яқинлашиш сиёсатини танлагани ҳақида хабарлар тарқалган эди. Бу эса Арманистоннинг Евросиё иқтисодий иттифоқидаги келажаги атрофида янги муҳокамаларни кучайтирмоқда.
Қисқаси, Остонадаги саммитдан кейин Путин ЕОИИ мамлакатлари билан иқтисодий ҳамкорликни Россия учун муҳим устувор йўналиш деб атади. Арманистон масаласида эса у очиқ сигнал берди: сиёсий танловлар алоҳида, аммо иқтисодий интеграцияда ҳар бир қарорнинг ўз нархи бор.
“Zamin”ни Telegram'да ўқинг!
