22:16 / 11.12.2022

Украинада урушнинг 290-куни: Бахмутдаги вайронгарчиликлар ва шаҳар мудофаасидаги аскарлар (фото)

Украинада урушнинг 290-куни ўтди. Асосий маълумотлар:

НАТО бош котиби Йенс Столтенберг Украинадаги уруш Россия ва альянс ўртасидаги тўқнашувга айланишидан хавфсирамоқда. Унинг сўзларига кўра, НАТОдагилар ҳар куни бундай эҳтимолдан қочиш устида ишламоқда.
Times нашрига кўра, Украина ҳудудлари ёппасига ўққа тутилиши давом этаётгани сабабли АҚШ энди Киевни Россиядаги нишонларга зарба беришдан қайтаришга уринмаяпти. Газета маълумотига кўра, Вашингтон энди бундай зарбалар можаро эскалациясига олиб келишидан қайғурмай қўйган.
Ослода 2022 йилги Тинчлик бўйича Нобел мукофотини топшириш маросими ўтказилди — мукофот Россия, Беларус ва Украинадан бўлган ҳуқуқ ҳимоячиларига берилди.
Украина қуролли кучлари маълумотига кўра, 11 декабрга ўтар кечаси мамлакат жанубида россияликларнинг дронлари ҳужуми кузатилган. 15 дрондан 10 таси уриб туширилган. Ҳужум оқибатида Одесса области ва Херсон шаҳридаги минглаб кишилар токсиз қолишган.
Днепропетровск областида тунги зарбалар оқибатида тўрт киши жабрланган.

Қуйида 10 декабр куни Украинанинг турли ҳудудларида олинган суратлар.

Бахмутдаги вайронгарчиликлар ва шаҳар учун қақшатқич жанглар

Бахмут — Россия армиясининг Донбассдаги ҳарбий ҳаракатларидаги муҳим йўналиш. Июл ойидан буён РФ қўшинлари шаҳарга тахминан 10 километр масофада илгарилаган. Украина президенти Володимир Зеленский фронтдаги вазият ҳақида гапира туриб, Бахмут бутунлай яксон этилганини айтган. Шаҳарнинг айни вақтдаги кўриниши қуйидаги суратларда:

^{Ўзининг вайрон бўлган уйи олдида турган бахмутликлар
Yevhen Titov / Reuters / Scanpix / LETA}

^{Маҳаллий аҳоли гуманитар ёрдам эвазига кун кечирмоқда
Ihor Tkachov / AFP / Scanpix / LETA}

^{Қутқарувчи ва унинг Скабей лақабли ити бошпанадаги печка олдида исинмоқда. Ўт ўчириш хизматлари ва қутқарувчилар отишмалар остида ишни давом эттиришмоқда — техникалар етиб борадиган ҳудудларда ёнғинлар бартараф этилмоқда.
Libkos / AP / Scanpix / LETA}

^{Вайронага айланган кўчалар бўйлаб кетаётган тинч аҳоли вакиллари
Yevhen Titov / Reuters / Scanpix / LETA}

^{Ярадор украин ҳарбийлари олиб келинаётган шаҳар шифохонаси ҳовлисидаги замбиллар
Libkos / AP / Scanpix / LETA}

^{Шаҳар ҳоспиталида ярадор украин аскарига ёрдам кўрсатаётган шифокор
Libkos / AP / Scanpix / LETA}

^{Бошпанада ҳордиқ чиқараётган украин ҳарбийлари
Yevhen Titov / Reuters / Scanpix / LETA}

^{Yevhen Titov / Reuters / Scanpix / LETA}

^{Украинанинг 24-бригадаси артиллериячилари Бахмут атрофидаги фронт чизиғидаги позицияда ўзиюрар 2С1 «Гвоздика» гаубицасига ўқ-дори юкламоқда. Фото: Ihor Tkachov / AFP / Scanpix / LETA}

^{Украина армиясининг Донбасс фронтидаги ҳарбий хизматчилари
Diego Herrera Carcedo / Anadolu Agency / ABACAPRESS / ddp images / Vida Press}

^{Россия ҳарбийлари зарбасидан кейин турар жой биносидаги ёнғин
Yevhen Titov / Reuters / Scanpix / LETA}

^{Бахмутнинг юқоридан кўриниши.
Libkos / AP / Scanpix / LETA}

^{«Россия армияси куйган харобаларга айлантирган Донбасснинг яна бир шаҳри», — деган Бахмут ҳақида украинлар президенти Володимир Зеленский одатдаги тунги видеомурожаатида.
Libkos / AP / Scanpix / LETA}
Изюм атрофида қолган россияликларнинг жасадлари

Харкив областининг Изюм шаҳри 1 апрел куни тўлиғича Россия қўшинлари томонидан босиб олинганди. Украина армияси шаҳарни фақат сентябр ойига келиб озод этишга муваффақ бўлди. Изюмда ҳам Украинанинг Россия истилосини бошдан кечирган бошқа шаҳарларидаги каби оммавий қабрлар аниқланган. Улардан биридан — тинч аҳоли вакиллари бўлган камида 445 кишининг жасади чиққан (улар орасида болалар ҳам бор) ва Украина ҳарбийлари кўмилган битта биродарлик қабри топилган. Украина ҳукуматига кўра, қурбонларнинг кўпчилик қисми жасадида қийноқ аломатлари аниқланган. Айримларни ўлим олдидан узоқ вақт давомида қийноққа солишган.

Изюм атрофида, далалар ва шаҳарга олиб борувчи йўлларда россиялик ҳарбийларнинг жасадлари ҳам қолган. Уларни украин кўнгиллилари йиғиб чиқишмоқда. Қуйидаги ушбу жараён акс этган фотосуратлар 6 декабр куни олинган.

^{Narciso Contreras / Anadolu Agency / ABACAPRESS / ddp images / Vida Press}

^{Narciso Contreras / Anadolu Agency / ABACAPRESS / ddp images / Vida Press}
Донецк ўққа тутилиши оқибатлари

10 декабрга ўтар кечаси Донецк ўққа тутилган. «ДХР» расмийлари баёнотига кўра, Украина томони шаҳарнинг Ворошилов райони бўйлаб «Град» баравар ўт очиш реактив тизимидан 20 та ракета учирган. Хабар қилинишича, камида бир киши ҳалок бўлган.