121
Нью-Йорк Олий суди судьяси вазифасини бажарувчи Хуан Мерчан бир қатор оммавий ахборот воситаларининг АҚШ собиқ президенти Доналд Трамп иши бўйича суд мажлисидан жонли эфирда трансляция қилиш имконияти ҳақидаги илтимосини рад этди, деб хабар берди CNN 4 апрел, сешанба куни.
Қайд этилишича, Мерчан ўз қарорини Трампнинг юридик гуруҳи суд залида камералар ўрнатилишига қарши чиқиб, бу «цирк» муҳитини яратишини айтганидан сўнг маълум қилган. Бироқ, Мерчан беш фотосуратчига суд бошланишида «суд ходимлари томонидан ҳакамлар ҳайъати учун жой бўшатиш тўғрисида буйруқ берилгунга қадар» суратга олишга рухсат беради.
Аввалроқ Нью-Йоркка келган Трамп сешанба куни судда унга 33 та банд бўйича айблов эълон қилинишини айтган эди. Уларнинг бир қисми бизнесдаги фирибгарлик фаолияти билан боғлиқ. Уларнинг барчаси Манҳэттен округи прокурори Элвин Брэгг томонидан жиноий айблов сифатида қайта таснифланган. Собиқ президент бу айбловларни тан олмади ва прокурорни маълумот сиздирганликда айблаб, истеъфога чиқиши кераклигини айтди.
30 март куни Нью-Йорк суди ҳакамлар ҳайъати Доналд Трампнинг актриса Сторми Дэниелсга 130 минг доллар тўлашга алоқадорлиги бўйича айблов хулосасини эълон қилди. Прокурорнинг сўзларига кўра, унга Трамп билан муносабатлари ҳақида «сукут сақлаш» учун пул берилган. Трампнинг ўзи ҳакамлар ҳайъати ҳукмини «сиёсий таъқиб» деб атади.
Трампнинг адвокати Лина Хабба суд жараёни адолатли ўтишига ишонмаслигини айтди. Флорида губернатори, 2024 йилда президентликка номзод бўлиши мумкин бўлган Республикачилар партияси вакили Рон Десантис Twitter’да прокурор «сиёсий рақибни нишонга олиш учун қонун доирасини кенгайтирмоқда» деб ёзди. «Ҳуқуқий тизимни сиёсий кун тартибини илгари суриш қуролига айлантириш қонун устуворлигини савол остига қўяди», деди Десантис.
Сешанба куни кечқурун судга келганидан сўнг, Трамп Флоридадаги қароргоҳига қайтиб, у ерда нутқ сўзлаши кутилмоқда.
«Замин»ни Telegram’да ўқинг!
14:28, 29-04-2025
