Озарбойжон президенти биринчи турк электромобилини қабул қилиб олди

^{Фото: AP}

Туркия президенти Ражаб Тоййиб Эрдўған бу электромобил Ўзбекистон президенти Шавкат Мирзиёевга ҳам совға қилинишини айтган эди.

4 апрель куни Озарбойжон президенти Илҳом Алиевга Туркияда ишлаб чиқарилган электромобил – Togg совға қилинди. Бу ҳақда Anadolu хабар берди.

Аввалроқ, Туркия президенти Ражаб Тоййиб Эрдўған Togg электромобилини Илҳом Алиевга совға қилинишини айтган эди.

«Менинг биродарим Илҳом Алиев ҳам Туркиянинг фахри – Togg электромобилини қабул қилиб олди. Биродаримга яхши кунларида машинадан фойдаланишини тилайман», деб ёзди Эрдўған ижтимоий тармоқда.

3 апрель куни Togg T10X серияли биринчи электромобил Туркия раҳбарига топширилган эди.

Шундан сўнг, Эрдўған ушбу электромобил Озарбойжон президенти Илҳом Алиевга ва Ўзбекистон президенти Шавкат Мирзиёевга ҳам совға қилинишини айтган эди.

Шухрат Раззаков

«ЗАМИН.УЗ» муҳаррири