Пригожин РФ армияси бўлинмаларини Бахмут атрофида «позицияларни жангсиз ташлаб кетиш»да айблади

«Вагнер» ХҲК асосчиси Евгений Пригожин РФ мунтазам армияси бўлинмаларини Бахмут ҳудудидаги позицияларни жангсиз ташлаб кетишда айблади.

«Қанотлардаги вазият прогноздаги энг ёмон сценарийлар бўйича ривожланмоқда. Кўплаб ойлар давомида бизнинг қуролдошларимиз қони ва жони эвазига олинган, ҳар куни ўнлаб ёки юзлаб метрдан юрилиб олинган ҳудудлар бугунги кунда қанотларимизни ушлаб туриши керак бўлганлар томонидан жангсиз ташлаб кетилмоқда», — деган у.

Шу билан бирга, унинг тасдиқлашича, унинг гуруҳининг штурмчи отрядлари шаҳарнинг ўзида муваффақият билан илгариламоқда. Пригожиннинг сўзларига кўра, шаҳарнинг ғарбий чеккасига чиқиш учун «атиги 625 метр»дан ўтиш қолган.

Евгений Пригожин сўнгги кунларда РФ мудофаа вазирлиги раҳбарияти манзилига кескин танқидлар ёғдирмоқда. Май ойи бошида у ўзи эълон қилган видеосида РФ мудофаа вазирлиги раҳбарларини сўкиб, вагнерчиларга ўқ-дори етказиб беришни талаб қилган, акс ҳолда унинг гуруҳи Бахмутдан кетишидан огоҳлантирганди.

9 май куни Пригожин мудофаа вазирлигининг 72-бригадаси шаҳардаги стратегик плацдармни ташлаб қочгани ҳақида айтиб чиқди. 

8 май куни Бахмут атрофидаги Россия позицияларига қилинган ҳужумда қатнашган Украина батальонининг «Ролло» лақабли командири эса CNN нашри билан суҳбатда Пригожиннинг бу сўзларига терс келувчи маълумотни айтди. Унинг сўзларига кўра, «Вагнер» бўлинмалари Бахмутдан жануби-ғарбдаги позицияларини тарк этганидан кейин Россия армиясининг 72-бригадаси қолган ва қаршилик кўрсатишда давом этган.

«Ролло»нинг қўшимча қилишича, россияликлар фақат қуршовга тушиб қолганидан кейин таслим бўлишган: «Биз уларни таслим бўлишга кўндириш учун икки соат уриндик».

Шухрат Раззаков

«ЗАМИН.УЗ» муҳаррири