Донецк вилоятининг Дружковка шаҳри суди Қозоғистоннинг 23 ёшли фуқароси Шингис Сейпиевни Россия томонидан урушга ёлланишда айблаб, 9 йилга озодликдан маҳрум қилди, деб хабар бермоқда “Грати” нашри.
Суд маълумотларига кўра, 2022 йил октябрь ойида Сейпиев Россиянинг Тюмен шаҳридаги 2-сонли ахлоқ тузатиш колониясида жазо ўтаётиб, Украинадаги урушга жўнатиш учун “Вагнер” хусусий ҳарбий компанияси томонидан ёлланган. Аввалига у Ростов вилоятидаги ўқув лагерида ҳарбий тайёргарликдан ўтган, сўнгра декабрь ойида аннексия қилинган Луганск халқ республикасига борган. 24 декабрда Сейпиев Бахмутнинг Яковлевка қишлоғига жўнатилган, у ерда бир ҳафта ўтгач, 30 декабрь куни Украина Қуролли кучлари томонидан асирга олинган.
Украина хавфсизлик хизмати маълумотларига кўра, Сейпиев Россияда зўрлашда айбланиб, ўн йиллик қамоқ жазосини ўтаётган эди. “Главком” нашрига берган интервьюсида унинг ўзи маст ҳолда жанжал қилиб дўстини ўлдириб қўйгани учун Тюмен колониясига тушганини айтди.
Сейпиевнинг сўзларига кўра, у икки йил жазо ўтаган ва қолган муддатини Россия колониясида ўтказишни истамагани учун “Вагнер” таркибида урушга боришга рози бўлган. “Уйга тезроқ қайтишни ўйлагандим”, — дейди у интервьюсида.
Тергов давомида Сейпиев ўз айбига иқрор бўлган, афв сўраган ва Украина прокуратураси билан бошқа жиноятларни очишда ҳамкорлик қилишга келишган. Бунинг эвазига у ёлланиш (Украина Жиноят кодексида беш йилдан ўн йилгача озодликдан маҳрум қилишни назарда тутади) моддаси бўйича максимал муддатдан камроқ йилга колонияга ҳукм қилинди.
“Замин” янгиликларини “Facebook”да кузатиб боринг
