Келиб чиқиши покистонлик бўлган Диловар Саййид Сенат томонидан Кичик бизнес администрацияси вице-президенти лавозимига тасдиқланди. Шу тариқа у Вашингтон ҳукуматидаги энг юқори мартабали мусулмонга айланди.
АҚШ Давлат департаментининг Савдо алоқалари бўйича махсус вакили Диловар Саййид ушбу лавозимга сенаторларнинг 54 овози билан маъқулланди.
Мериленд штатидан демократ сенатор, Сенатнинг Кичик бизнес ва тадбиркорлик қўмитаси раиси Бен Кардин овоз беришдан олдин қилган баёнотида ушбу лавозим АҚШнинг икки президенти даврида жами 5 йил давомида бўш турганини таъкидлар экан, “Буни ҳал этиш вақти келди”, деди.
Саййид АҚШ президенти Жо Байден томонидан 2021 йил март ойида мазкур лавозимга номзод қилиб кўрсатилган, бироқ Сенатдаги республикачилар томонидан Кичик бизнес администрациясининг аборт қилиш билан шуғулланувчи корхоналарни молиявий қўллаб-қувватлаши ва бошқа сабабларни рўкач қилиб, мусулмон киши номзодини овозга қўйилишига бир неча бор тўсқинлик қилишган эди.
Бу вақт ичида демократлар республикачиларнинг мусулмонларга қарши кайфиятига омманинг эътиборини тортди ҳамда мусулмон ва яҳудий нодавлат ташкилотларининг ўз эътирозларини баён этишлари учун замин яратди.
Президент Жо Байден шу йил бошида Саййид номзодини Сенатда қайтадан овозга қўйганди.
“Замин” янгиликларини “Одноклассники”да кузатиб боринг
