Google компаниясининг собиқ бош директори Эрик Шмидт ким ошди савдосида Алфа Неро суперяхтасини сотиб олди. Бу ҳақда Bloomberg хабар берди.
Яхта 2022 йил февраль ойида Россия Украинага ҳужум қилганидан бери Антигуа ва Барбудада бўлган. Ўша йилнинг август ойида АҚШ Ғазначилигининг Хорижий активларни назорат қилиш бошқармаси “FosAgro” ҳаммуаллифи Андрей Гуревни кема эгаси деб эълон қилган, у санкциялар рўйхатига киритилган.
2023 йил март ойида Антигуа ва Барбуда расмийлари, агар яхта эгаси ўн кун ичида келмаса ва унга бўлган ҳуқуқларини талаб қилмаса, “рус олигархига” тегишли деб айтилган яхтани ким ошди савдосига қўйишини эълон қилган.
Антигуа ва Барбуда ҳукумати АҚШдан яхтага қўйилган санкцияни олиб ташлашни сўраган. Ҳукумат яхтани сақлаш харажатлари туфайли уни аукционда сотишга қарор қилган. 1 июнь куни АҚШ яхтага қўйилган чекловларни олиб ташлаган.
Шмидт яхта учун 67,6 миллион доллар тўлаган. Тадбиркор 2001—2011 йилларда Google компаниясининг бош директори бўлган. У Bloomberg миллиардерлар индексида 25 миллиард доллар бойлиги билан 59-ўринда, Гурев эса 10,3 миллиард доллар билан 195-ўринда туради.
АҚШ молия вазирлиги Гурев яхтани 2014 йилда 120 миллион долларга сотиб олганини маълум қилди. Forbes ва Observer бизнесменнинг кема билан алоқаси борлиги ҳақида ёзган. Шу билан бирга, 2015 йилда Гуревнинг вакили тадбиркорнинг яхтаси йўқлигини, лекин уни “мунтазам равишда ижарага олишини” айтган.
“Замин” янгиликларини “Twitter”да кузатиб боринг
