Америкалик миллиардер Илон Маскнинг онаси Мей Маск Мета корпорацияси раҳбари Марк Цукерберг билан ўғли ўртасидаги жангни бекор қилганини айтди.
Маск ва Цукерберг Лас-Вегасдаги октагонда орани очиқ қилиб олишга келишишганди.
“Аслида мен жангни бекор қилдим. Мен уларга ҳали айтмадим. Лекин ҳар эҳтимолга қарши жанг бекор бўлганини айтиб қўймоқчиман”, — деб ёзди Маск хоним Twitter’да.
Мей Маскнинг қўшимча қилишича, Илон Маск ва Марк Цукерберг ўртасидаги дуэль фақат гап орқали бўлиши керак.
“Кимни гапи қизиқроқ бўлса, у ғалаба қозонади”, дея қўшимча қилди у. Бунга Илон Маск смайлик билан муносабат билдирди.
Аввалроқ, Маск Twitter’да Цукерберг билан орани очиқ қилиб олиш учун октагонда жанг қилишга тайёр эканлигини айтди.
Цукерберг Маскнинг таклифига Instagram’даги stories’да “Менга жанг жойини юбор”, деган ёзув билан жавоб берди. “Лас-Вегасдаги октагон”, деди Маск.
Маълум қилинишича, Мета компанияси Twitter’га рақобатчи дастурни ишга тушириш ниятида экани ҳақида маълумот пайдо бўлгач, Илон Маск Марк Цукербергни жангга чақирган.
“Замин” янгиликларини “Facebook”да кузатиб боринг
