Африкадан Ўзбекистонга олиб кетилаётган бананлар орасидан 50 кило кокаин топилди. Юк белгиланган манзилга етиб бормаган: Санкт-Петербург портида божхоначилар томонидан тўхтатиб қолинган.
Россия Федерал божхона хизматининг маълум қилишича, наркотик моддалар “Гаван” божхона постига келган ўнлаб рефрижераторли (совиткичли) контейнерларнинг биридан топилган. Контейнер сканер қилинганда инспектор мониторда совитиш мосламасининг яширин бўшлиғида ёт буюмлар яширилганини кўрган.
Текширув натижасида плёнкага қадоқланган оқ кукунли 50 дона брикет топилган. Экспертиза натижаларига кўра, у кокаин эканлиги аниқланган.
Ҳужжатларга кўра, юк Африка давлатларидан Европа орқали Ўзбекистонга турли денгиз кемаларида транзит орқали олиб кетилаётган бўлган.
Ҳолат юзасидан Россия Жиноят кодексининг 229-1-моддаси (наркотик моддалар контрабандаси) билан жиноят иши қўзғатилган.
“Замин” янгиликларини “Инстаграм”да кузатиб боринг
