Чеченистон раҳбари Рамзон Қодировнинг расмий равишда Миллий гвардия таркибига кирувчи бўлинмалари танк ва самолётларни қабул қилиш ҳуқуқига эга бўлади. Бу Давлат думаси томонидан бирданига уч ўқишда бир овоздан қабул қилинган, Россия гвардиясига ўзининг оғир ҳарбий техникасига эга бўлиш имконини берувчи қонун лойиҳаси туфайли мумкин бўлади, деб хабар берди 19 июль, чоршанба куни кечқурун «Агентство» ўзининг Telegram-каналида.
Шу пайтгача Чеченистон раҳбари армияси росгвардиячилар билан бирга фақат енгил зирҳли техникага эга эди.
Давлат думаси томонидан қабул қилинган ҳужжат ҳали Федерациялар кенгаши томонидан тасдиқланиши ва Россия президенти Владимир Путин томонидан имзоланиши керак. «Агентство» таъкидлашича, қонун лойиҳаси, аслида, Путиннинг собиқ қўриқчиси Виктор Золотов тузилмасини мустаҳкамлашга қаратилган, бироқ айни пайтда Қодиров назорати остидаги ҳарбийлаштирилган кучларни ҳам кучайтириши мумкин.
Қодировнинг асосий кучлари Росгвардия таркибига киради, улар орасида А.А.Қодиров номидаги 141-махсус полк, 249-алоҳида «Юг» махсус батальони, «Ахмат-Грозний» махсус топшириқли кучлар отряди, «Ахмат» «СОБР»и, шунингдек, 1- ва 2-сонли полклар бор. Oryx аналитик лойиҳаси ушбу бирликларда ҳали оғир ускуналар йўқлигини тасдиқлади. Шу билан бирга, баъзи жиҳозлар, жумладан Исроилда ишлаб чиқарилган (Zibar MK2 енгил зарбали машина) техника фақат «қодировчилар»да мавжуд, аммо росгвардиячилар йўқ.
Ҳозир Қодиров қўшинлари пиёда жанговар машиналари, зирҳли транспортёрлар, зирҳли жанговар машиналар, миналардан ҳимояланган машиналар, зирҳли автомобиллар, енгил ҳужум машиналари, пикаплар ва юк машиналари билан қуролланган.
«Вагнер» ХҲК исёнидан кейин Кремль Росгвардияни кучайтириш тўғрисида қарор қабул қилди, исён вақтида ёлланма аскарлар деярли Москвагача етиб борди ва пойтахтдан атиги 200 км узоқликда тўхтади. Исён барбод бўлганидан уч кун ўтиб, 27 июн куни Росгвардия раҳбари Виктор Золотов Россия гвардиясида оғир қуроллар ва танклар бўлишини эълон қилди, бу масала аллақачон Путин билан муҳокама қилинган. «Вагнер» ХҲК раҳбари Евгений Пригожиннинг исёнини шарҳлар экан, Золотов «исёнчилар Москвани барибир эгаллаб ололмасди», деди.
24 июнга ўтар кечаси Пригожин Москвага «Адолат марши»ни бошлади. Бундан олдин унинг ёлланма аскарлари жойлашган жойлар Россия Мудофаа вазирлиги кучлари томонидан ўққа тутилгани ҳақида баёнот берилган. Вазирлик бу айбловни рад этди. 24 июн куни «Вагнер» ХҲК жангчилари Ростов-Донга, шу жумладан танкларда кириб борди, шунингдек, Воронеж ва Липецк вилоятлари орқали пойтахт томон ҳаракатланди. Олдинга юриш пайтида ёлланма аскарлар камида иккита жанговар вертолёт ва битта самолётни йўқ қилди.
Исён бошланганидан бир кун ўтмай, Пригожин ўз колонналарини ортга бурди. Бу Беларус раҳбари Александр Лукашенко билан музокаралардан сўнг амалга оширилди. Президент матбуот котиби Дмитрий Песков Пригожиннинг «Беларусга кетиши» ҳақида ваъда берди.
“Замин” янгиликларини “Инстаграм”да кузатиб боринг
