Ағдарилган Нигер президенти АҚШ ва жаҳон ҳамжамиятидан ёрдам сўради

Нигернинг демократик йўл билан сайланган президенти Муҳаммад Базум АҚШ ҳукумати ва “бутун халқаро ҳамжамият”дан мамлакатда конституциявий тартибни тиклашда ёрдам сўради. Базумнинг таъкидлашича, агар уни президентликдан четлаштиришга уриниш муваффақиятли якунланса, бу Нигер учун, қолаверса, “минтақа ва бутун дунё учун ҳалокатли оқибатларга олиб келади”. Бу ҳақда у Washington Post газетасида чоп этилган мақоласида ёзди.

Давлат раҳбари 26 июль куни президент соқчилари уни ҳибсга олиб, Нигер ҳукумати устидан назорат ўрнатганидан бери илк бор тўнтариш ҳақида батафсил гапирди.

“Мен буни гаровдаги одам сифатида ёзяпман”, — деди Базум баёнотида. “Нигер ҳарбий хунта томонидан ҳужумга учради... мен эса ўзбошимчалик билан ва ноқонуний равишда қамоққа ташланган юзлаб фуқаролардан бириман”.

Базум хунта “ноқонуний равишда ҳибсга олинганларнинг барчасини озод қилиши керак” деб таъкидлади.

“Россия ‘Вагнер’ ёрдамида Африкадаги таъсирини кучайтириши мумкин”

Муҳаммад Базум икки йил аввал мамлакатда ҳокимиятнинг тинч йўл билан демократик бошқарувга ўтказилиши натижасида Нигер президенти этиб сайланган эди.

“Африканинг нотинч Саҳел минтақасида, қўшниларимизни қамраб олган авторитар ҳаракатлар шароитида Нигер инсон ҳуқуқларига риоя қилишнинг сўнгги таянчидир”, — деб ёзади Базум Washington Post газетасига.

Унинг қўшимча қилишича, Нигерга қўшни давлатлар “Вагнер” сингари жиноий рус ёлланма аскарларини ўз халқларининг ҳуқуқлари ва қадр-қимматига зиён етказиш учун” тобора кўпроқ таклиф этмоқда.

Украинада ўз шафқатсизлиги ва терроризмини тўлиқ намоён қилган “Вагнер” ёрдамида бутун Саҳел минтақаси Россия таъсирига тушиши мумкин, — деб огоҳлантирди президент.

У “Боко Ҳарам” каби жиҳодчи гуруҳлар ҳам Нигердаги беқарорликдан фойдаланишини қўшимча қилди. Улар мамлакатдан “қўшни давлатларга ҳужум қилиш ва бутун дунёда тинчлик, хавфсизлик ва эркинликка путур етказиш учун трамплин сифатида” фойдаланиши мумкин, дейди Базум.

Янгиликлар