00:42 / 03.09.2023

Шольц ядровий энергияни Германия учун “ўлик от” деб атади

Германия атом энергиясидан фойдаланишга қайтмайди, деди канцлер Олаф Шольц Deutschlandfunk радиосига берган интервьюсида.

“Германиядаги ядровий энергия муаммоси — ўлик от. Атом электр станцияларини қурмоқчи бўлган кишига 15 йил вақт керак бўлади ва битта АЭС учун 15 миллиард евродан 20 миллиард еврогача маблағ сарфлаш зарур”, — деди Шольц.

Унинг таъкидлашича, мамлакатда ядро энергетикаси “тугатилган” ва бундан кейин фойдаланилмайди.

Немис тилида Ein totes Pferd reiten ибораси мавжуд бўлиб, у том маънода “ўлик отга миниш” деб таржима қилинади. Бу узоқ истиқболда ўзини оқламайдиган ишга куч сарфлашни англатади.

Жорий йилнинг апрель ойида Германияда мамлакатда ишлаётган сўнгги учта АЭС ўчирилди. Шу тариқа мамлакатда тинч атом энергиясининг 60 йиллик тарихи якунланди. Германияда АЭС қурилишига қарши биринчи норозилик намойишлари 1970 йилларда бошланган, 1998 йилда мамлакатнинг Социал-демократик партияси (SPD, Шольц унинг аъзоси) ва Яшиллар ўз олдига атом энергиясидан воз кечишни мақсад қилган. 2002 йилда бу қонун билан мустаҳкамланган.

АЭСдан воз кечиш тўғрисидаги якуний қарор канцлер Ангела Меркель ҳукумати томонидан 2011 йилда Япониядаги “Фукусима-1” атом электр станциясидаги ҳалокатдан кейин қабул қилинди. Охирги немис станциялари 2022 йилда ёпилиши керак эди, бироқ Украинадаги уруш ва энергетика инқирози туфайли реакторларни тўхтатиш жорий йилнинг баҳорига кўчирилди.

Мамлакатда энергия инқирози ҳамон давом этмоқда, шунинг учун айрим сиёсатчилар апрель ойида иши тўхтатилган учта станцияни бузмасликни ва ҳатто янгиларини қуришни ёқлаб чиқмоқда. Шольц эса мамлакатнинг электр энергиясига бўлган эҳтиёжини қайта тикланадиган манбалар билан қондириш тарафдори.