АҚШ президенти Украинага кўпроқ ёрдам тақдим этишга ваъда берди

^{Фото: Manuel Balce Ceneta/AP Photo/picture alliance}

АҚШ Конгресси Украинага қўшимча ёрдам учун маблағ ажратмаган вақтинчалик бюджет бўйича келишувга эришганидан сўнг, АҚШ президенти Жо Байден Киевни Вашингтон уни қўллаб-қувватлашда давом этишига ишонтирди. «Америка иттифоқдошларимизни, Америка халқини ва Украина халқини ишонтириб айтмоқчиманки, сиз бизнинг ёрдамимизга таянишингиз мумкин. Биз буни рад этмаймиз», - деди Америка етакчиси 1 октябр, якшанба куни Оқ уйда сўзлаган нутқида.

Бир кун олдин АҚШ Конгресси икки партиявий кўпчилик овоз билан федерал ҳукуматнинг ёпилишига йўл қўймаслик учун атиги 45 кунга амал қиладиган вақтинчалик бюджет лойиҳасини маъқуллади. Бироқ бу ҳужжатда Украинага ҳеч қандай ёрдам назарда тутилмаган. Америка Қўшма Штатлари собиқ президенти Доналд Трампга яқин бўлган бир гуруҳ қонун чиқарувчи республикачилар мамлакатга кейинги ёрдам кўрсатишга қарши чиқди.

Оқ уй раҳбари янги қўллаб-қувватлаш пакетини тасдиқлаш учун кўп вақт қолмагани ҳақида огоҳлантирди. Якшанба кунги нутқида Байден Конгресснинг Киевга ёрдам кўрсатишни маъқуллаши учун «шошилинч чоралар кўриши»ни билдирди. АҚШ президенти республикачиларни тасдиқланган вақтинчалик бюджет муддати тугаганидан кейин янги бюджет инқирозининг олдини олишга чақирди ҳамда республикачилар ва демократлар «соф сиёсий сабабларга кўра Украинада бундан ҳам кўпроқ одамларнинг кераксиз ўлимига йўл қўймаслигига» ишонч билдирди.

Киевнинг Конгресс қарорига муносабати 

Украина ҳукумати, ўз навбатида, Вашингтоннинг қўллаб-қувватлашига ишонч билдирди. Украина ТИВ матбуот котиби Олег Николенконинг айтишича, Киев америкалик ҳамкорлари билан АҚШнинг навбатдаги бюджетига «Украинани қўллаб-қувватлаш учун янги маблағлар» киритилишини таъминлаш учун «фаол» ишламоқда.

Украина мудофаа вазири Рустем Умеров 1 октябр куни хабар қилганидек, унинг америкалик ҳамкасби Ллойд Остин телефон суҳбатида Вашингтоннинг Киевни урушда ҳимоя қилишда қўллаб-қувватлаши давом этишига ишонтирди.

Украинага энг катта ёрдамни АҚШ кўрсатди

Қўшма Штатлар 2022 йил февралида ҳарбий ҳаракатлар бошланганидан кейин Украинага энг кўп ёрдам кўрсатган давлатдир. Вашингтоннинг ёрдами ҳажми аллақачон 110 миллиард долларни (103,9 миллиард евро) ташкил этди.

АҚШнинг янги бюджет лойиҳаси 24 миллиард долларлик қўшимча ёрдам пакетини ўз ичига олган, аммо энди бу пакет Конгресс томонидан алоҳида тасдиқланиши керак. Америка матбуоти хабарларига кўра, яқин орада бу масала бўйича овоз бериш бўлиб ўтади.

Шухрат Раззаков

«ЗАМИН.УЗ» муҳаррири