Россиянинг Қорачой-Черкесия Республикаси раҳбари Рашид Темрезов Рамзан Қодировнинг 15 ёшли ўғли Адамга республика олий давлат мукофоти топширилганини маълум қилди.
“Адам Қодиров миллатлараро ва минтақалараро бирликни ривожлантириш, анъанавий ислом қадриятларини мустаҳкамлашга қўшган шахсий ҳиссаси учун ‘Қорачой-Черкесия Республикаси олдидаги хизматлари учун’ ордени билан тақдирланди”, — деб ёзган Темрезов ўзининг Telegram-каналида.
Темрезов Чеченистон раҳбарининг ўғлини “ҳақиқий ватанпарвар” деб атади.
24 октябрь куни Татаристон раҳбари Рустам Миннихонов Чеченистон раҳбари Рамзан Қодировнинг ўғли Адамни “миллатлараро ҳамда конфессиялараро тинчлик ва тотувликни мустаҳкамлашга қўшган улкан ҳиссаси учун” “Дўстлик” ордени билан тақдирлагани маълум бўлганди.
Сентябрь ўрталарида Адам Қодиров Қуръонни ёқиб, диндорларнинг туйғуларини ҳақоратлашда айбланаётган волгоградлик Никита Журавелни Чеченистон тергов изоляторида калтаклагани акс этган видео эълон қилинганди. Рамзан Қодиров ўғлининг қилмишидан фахрланишини айтган.
“Замин” янгиликларини “Telegram”да кузатиб боринг
