Исроил Ғазо секторида қуруқлик операциясини кенгайтирмоқда, деди Исроил армияси вакили Даниэл Ҳагарий. 27 октябр оқшомида Исроилда, шунингдек, Ғазо секторида жанглар авж олди.
Исроил шаҳарлари аҳолиси оммавий ўққа тутишлар ҳақида хабар бермоқда. Жумладан, Тошкент вақти билан соат 22:00 да Тел-Авивда ҳаво ҳужумидан огоҳлантирувчи сирена уч марта янграган. Шунингдек, кун давомида ракета шаҳардаги турар-жой биносига келиб урилгани оқибатида 4 киши яраланган.
Кўп ўтмай, ОАВ Ғазо сектори кучли ўққа тутилгани ҳақида хабар берди. Fox News мухбири Трей Ингст сўзларига кўра, бу 17 октябрдан бери энг оммавий зарбалардир. Al Jazeera ҳам худди шу мазмундаги хабарни берди: «Ғазо уруш бошланганидан бери қуруқлик, денгиз ва ҳаводан энг кучли бомбардимонларга гувоҳ бўлмоқда». Ғазонинг шимолий қисмига кучли зарбалар берилгани айтилмоқда.
Бундан ташқари, бутун Ғазо бўйлаб интернет ва алоқа узилиб қолган, деб хабар берди ҲАМАС расмийларга таяниб AFP. Мустақил Netblocks сервиси ҳам Ғазода интернетга уланишлар сони кескин камайганини маълум қилди.
Ҳарбий экспертлар Исроилнинг икки ҳафтадан буён айтилаётган ҳужумининг эҳтимолий бошланиши ҳақида ёзмоқда, гарчи бир оз олдин Исроил бош вазири Бенямин Нетаняху тегишли буйруқни имзоламагани, чунки ҳарбий раҳбарият уни якдил маъқулламагани ҳақида хабар берилган бўлса-да.
Буни билвосита Исроил оммавий ахборот воситалари ҳам тасдиқлаяпти, чунки, уларнинг ёзишишча, Исроил Соғлиқни сақлаш вазирлиги бир нечта шифохоналарга гаровга олинган исроилликларни қабул қилиш мумкин бўлган палаталарни тайёрлашни буюрган. Булар Беэр Шевадаги «Сорока» шифохонаси, Рамат Гандаги «Шеба» шифохонаси, Холондаги Волфсон тиббиёт маркази ва Петаҳ-Тиквадаги Шнайдер тиббиёт маркази.
Шу билан бирга, оммавий ахборот воситаларининг таъкидлашича, ушбу буйруқ озод қилинган маҳкумларга ёрдам кўрсатишнинг потенциал эҳтиёжига умумий тайёргарликнинг бир қисмидир, аммо уларнинг тезда озод қилиниши ҳақидаги аниқ маълумот олиш натижаси эмас.
“Замин” янгиликларини “Telegram”да кузатиб боринг
