Маск ўзининг наркотикка ружу қўйгани ҳақидаги айбловларга жавоб берди

^{Фото: Getty Images}

Бизнесмен, Tesla ва SpaceX асосчиси Илон Маск ўзининг гиёҳванд моддаларга ружу қўйгани ҳақидаги айбловларни рад этди. Унинг сўзларига кўра, сўнгги уч йиллик ҳолати бўйича ўтказилган тестлар унинг организмида нафақат гиёҳванд моддалар, балки спиртли ичимликларнинг изи ҳам йўқлигини кўрсатган. Бу ҳақда миллиардер Х (собиқ Twitter) ижтимоий тармоғидаги саҳифасида ёзди.

“Роган билан учрашганимдан сўнг, мен NАSA илтимосига кўра, уч йиллик наркотик тестдан ўтишга рози бўлдим. Гиёҳванд моддалар ёки алкоголнинг ҳатто изи ҳам топилмади”, — деб ёзган Маск.

Аввалроқ The Wall Street Journal нашри Илон Маск ноқонуний гиёҳванд моддаларни истеъмол қилгани ҳақида катта материал чоп этганди.

Нашр маълумотларига кўра, Маск дунё бўйлаб ёпиқ хусусий кечаларда қатнашиш пайтида LSD, кокаин, экстази ва психоделик қўзиқоринларни истеъмол қилган. Бундай учрашув иштирокчилари маълумотларини ошкор этмаслик тўғрисида шартнома имзолайди, дейилади мақолада.

Маскнинг адвокати Алекс Спиронинг WSJ нашрига айтишича, Маск SpaceX’да мунтазам ва кутилмаган наркотик тестларидан ўтиб туради, уларнинг барчаси манфий чиққан. Унинг сўзларига кўра, мақоладаги “бошқа фактлар ҳам ёлғон”.

Шу билан бирга, гиёҳванд моддаларни ноқонуний истеъмол қилиш Маск компаниялари сиёсатига зиддир ва 14 миллиард долларлик давлат шартномаларига, бизнесменнинг обрўси ва мавқейига хавф туғдириши мумкин. Миллиардернинг атрофидагилар унинг тез-тез жаҳлдор ва беқарор хатти-ҳаракатларини намоён этишига одатланган. Бироқ сўнгги бир неча йил ичида вазият ёмонлашди.