“Толибон” 100 га яқин сув тўғони қурмоқчи

^{Фото: Ҳилманд вилоятидаги Кажаки тўғони / USACE}
“Толибон” қурғоқчиликнинг олдини олиш мақсадида ерости сувларини мустаҳкамлаш учун 100 га яқин кичик сув тўғонлари қуришни режалаштирмоқда. Бу ҳақда Афғонистон энергетика ва сув вазири вазифасини бажарувчи Абдуллатиф Мансурга таяниб, TOLOnews хабар берди.

Мансурнинг айтишича, бир қанча тўғонлар очилган ва яна бир қанча тўғонлар қурилмоқда.

“Биз қисқа вақт ичида 93 та тўғон қуриш бўйича шартнома туздик, улардан 5 таси Логарда, 5 таси Майдан Вардакда ва Саманган вилоятида қуриб битказилди”, — дея қўшимча қилди у.

Бироқ бир қанча фермерлар сув етишмаслигидан шикоят қилиб, деҳқончиликни давом эттира олмаяпти. Уларнинг фикрича, сувнинг қисқариши ва кетма-кет қурғоқчилик мамлакатда ишсизлик даражасини оширган.

“Ўтган уч йилдан буён қурғоқчилик, айниқса, картошка ва ғалла етиштиришда аҳолига қаттиқ таъсир кўрсатди", — дейди фермер Муҳаммад Сарвар.

“Ерда ҳеч нарса ўсмайди, шу йилларда одамлар жуда кўп азоб чекди”, — дейди яна бир фермер Жуммахон.
Вазир вазифасини бажарувчи ушбу лойиҳаларнинг қурилиши билан сув танқислиги ҳам бартараф этилишини айтмоқда. “Замин” янгиликларини “Telegram”да кузатиб боринг