Британия ташқи ишлар вазири Фаластин давлатини тан олиш шартини айтди

^{Фото: Arab News}
Буюк Британия Ғазодаги уруш бўйича музокаралар якунланишини кутмасдан мустақил Фаластин давлатини расман тан олиши мумкин. Бу ҳақда Британия ташқи ишлар вазири Девид Кемерон Associated Press агентлигига берган интервьюсида маълум қилди.

“Бу йўлда биринчи қадам ҳарбий ҳаракатлардаги пауза бўлиб, у охир-оқибат доимий ва ишончли ўт очишни тўхтатишга айланади. Ғазо 7 октябрда Исроилга ҳужумни амалга оширган одамлар томонидан назорат қилинар экан, можарони икки давлат асосида ҳал қилиш мумкин эмас”, — дейди вазир.

Кемероннинг сўзларига кўра, Фаластинни тан олиш “музокара жараёнининг бошида бўлиши мумкин эмас, лекин бу жараённинг охиригача кутишнинг ҳам ҳожати йўқ”.

“Биз фаластинликларга яхши келажак, ўз давлатига эга бўлган истиқболни беришимиз керак”, — деди у ва бу “минтақада узоқ муддатли тинчлик ва хавфсизлик учун мутлақо зарур” эканини таъкидлади. “Замин” янгиликларини “Telegram”да кузатиб боринг