Россия Украинага янги авиабомбалар билан зарба берди

^{Фото: Донецк вилоят прокуратураси}
Россия ҳарбийлари Донецк вилоятининг Мирноград шаҳрини ўққа тутишда янги авиабомбалардан фойдаланди. Бу ҳақда Украина мудофаа кучлари спикери Дмитрий Лиховойга таяниб, “РБК-Украина” хабар берди.

“Дастлабки маълумотларга кўра, душман “С-300” зенит ракета тизимидан фойдаланган. Бироқ полициядан олинган янгиланган маълумотларга кўра, бу ҳужумда руслар учта УМПБ Д-30СН бомбаларини қўллаган”, — деди у.

Ушбу қуроллардан фойдаланиш Россиянинг бошқариладиган авиабомбаларини яратишнинг янги босқичидан далолат беради.

^{Фото: “УМПБ Д-30СН”}
“Бу такомиллаштирилган ҳаво бомбаси бўлиб, у аллақачон классик эски ФАБлар (500 кг оғирликдаги Совет авиабомбаси) ўрнини эгалламоқда. Улар қўшимча режалаштириш функциялари ва қўшимча энергия комплексига эга. Шунинг учун, афсуски, биз курашда янги чақириқларга ва мазкур авиабомбаларга қарши янги ҳаво ҳужумидан мудофаа тизимларининг вазифаларига тайёргарлик кўришимиз керак”, — дейди Лиховой.

Россия армияси 10 март куни тунда Мирноградга ҳужум қилди. Сўнгги маълумотларга кўра, 11 киши жароҳатланган. Шаҳарда вайронагарчиликлар қайд этилган.

“УМПБ Д-30СН” ҳаво бомбаси Швециянинг GLSDB, Американинг Powered JDAM ва Франциянинг ААСМ бомбаларининг русча аналогидир. У 250 килограм оғирликдаги жанговар каллакни кўтаради. Бомба ёқилғи баки ва реактив двигатель билан жиҳозланиши мумкин, бу унинг парвоз масофасини сезиларли даражада оширади. “Замин” янгиликларини “Telegram”да кузатиб боринг