Дума ҳарбийларни жавобгарликдан озод қилишни маъқуллади

^{Фото: Uncredited/AP Photo/picture alliance}
Россия Давлат думаси биринчи ўқишда «махсус ҳарбий операция» даврида ҳарбий хизматга сафарбар қилинган ва Мудофаа вазирлиги билан шартнома тузган шахсларни жиноий жавобгарликдан озод қилувчи қонун лойиҳасини қабул қилди. Овоз бериш 12 март, сешанба куни бўлиб ўтди.

Парламент қуйи палатаси веб-сайтида эълон қилинган қонун лойиҳаси матнига кўра, тергов ва судловда бўлган ёки енгил ва ўртача оғирликдаги жиноятлар учун судланган шахслар Мудофаа вазирлиги билан шартномалар туза олади. Шартномани имзолаш вақтида аллақачон жазони ўтаётган шахслар хизматдан бўшатилгандан кейин ёки давлат мукофоти билан тақдирлангандан кейин жазони шартли жазога алмаштириши мумкин. Собиқ маҳкумларнинг хатти-ҳаракатларини кейинги назорат қилиш улар ҳарбий қисми қўмондонлигига юкланади.

Қонун лойиҳаси, хусусан, экстремизм, терроризм, ҳудудий яхлитликни бузиш, давлатга хиёнат қилиш ва «номақбул ташкилот» билан ҳамкорлик моддалари бўйича судланганларга нисбатан қўлланмайди. Шунингдек, вояга етганларнинг жинсий дахлсизлигига қарши, конституциявий тузум ва давлат хавфсизлиги асосларига қарши жиноятлар содир этганлиги учун жазо муддатини ўтаётган шахслар фронтга жўнатилмайди.

Қонун лойиҳаси ҳаммуаллифлари Думанинг Қонунчилик ва давлат қурилиши қўмитаси раҳбари Павел Крашенинников, Мудофаа қўмитаси раҳбари Андрей Картаполов ва сенатор Андрей Клишас эди. Уларнинг барчаси «Единая Россия» партияси аъзоларидир.

Россияда бундай қонун мавжуд эди

2023 йил июн ойида Давлат думаси Мудофаа вазирлигига тергов остида бўлган, жазони ўтаётган ёки судланган шахслар билан шартнома тузиш имконини берувчи қонун лойиҳасини қабул қилди. Бироқ, янги қонундан фарқли ўлароқ, у фақат қабул қилинишидан олдин жиноят содир этганлар билан амалга оширилишига рухсат берган.

Янги қонун лойиҳаси ҳаммуаллифларидан бири Павел Крашенинниковнинг сўзларига кўра, эски қонун «вақтинчалик» эди.

Фронтдан қайтган жиноятчилар жиноят содир этишда давом этмоқда

«Верстка» нашри ёзганидек, биргина 2023 йилда «Вагнер» ХҲКга ишга қабул қилинган ва афв этилган маҳкумларга нисбатан 200 га яқин жиноий иш очилган. Уларнинг аксарияти - ўғирлик ёки талончилик учун. “Замин” янгиликларини “Telegram”да кузатиб боринг