Россияда «Крокус»даги теракт ҳақида изоҳлар учун қўлга олишлар бошланди

^{Фото: РИА Новости}
Москва яқинидаги «Крокус Сити Холл»да терактдан сўнг Россиянинг турли минтақаларида 28 март, пайшанбага қадар теракт ҳақидаги изоҳлар туфайли ўнга яқин киши қўлга олинди. Уларнинг деярли барчаси оммавий равишда узр сўраяпти.

Терроризмни оқлаганликда айбланиб қўлга олинган ва кейин икки ойга тергов изоляторига жўнатилганлардан биринчиси - петербурглик декоратор Николай Конашенок, у Facebook ижтимоий тармоғида: «Нега Кремл эмас, Крокус?» деб ёзган. Конашенок - Санкт-Петербургдаги машҳур «Новая Голландия» арт-лойиҳаси собиқ бош директори Роксана Шатуновскаянинг эри, у теракт ҳақидаги изоҳдан сўнг деярли дарҳол ишдан кетди. Иккаласи ҳам кечирим сўрашга мажбур бўлди.

Турли ҳудудларда қўлга олишлар

Санкт-Петербургда қўлга олинган яна бир шахс – Тожикистон фуқароси бўлиб, у Telegram’да теракт ҳақидаги хабар остида ҳазиллашган. Astra Telegram-каналининг хабар беришича, айбланувчи 26 ёшли Баҳодир Зуҳуровдир. Унга беш йилгача қамоқ жазоси берилиши мумкин. Тергов қўмитаси эълон қилган видеода ҳибсга олинган шахс узр сўраган ва «бу бошқа такрорланмаслигини» айтган.

Бошқирдистонда блогер Рустам Абсалямов Крокусдаги теракт ҳақида трансляция туфайли ушланди. «Осторожно, новости» Telegram-канали хабарига кўра, трансляция пайтида блогер «Москвани портлатиш»га чақирган. Стерлитамак Ички ишлар вазирлиги эркакни видео орқали узр сўрашга мажбур қилди.

Липецк вилоятида уруш қатнашчисининг онаси қўлга олинди, у «Крокус»даги теракт Белгороднинг ўққа тутилишидан кўра катта резонанс келтириб чиқарганини айтган. Полиция текширув ўтказмоқда.

Қўлга олинганларнинг ёши - 9 ёшдан 75 ёшгача

Нижний Новгородда полиция 15 ёшли мактаб ўқувчисининг ота-онасига нисбатан маъмурий баённома расмийлаштирди, ўсмир видеода теракт туфайли у Москвага бориши шарт эмаслигини, бу эса «кайф-у сафони давом эттириш мумкин» деган маънони англатишини айтган.

Яна бир мактаб ўқувчиси - Тивада яшовчи тўққиз ёшли қиз қўлга олинганидан кейин ФСБга зериккани сабабли нотаниш абонентга «500 минг рубл эвазига теракт содир этиши мумкинлиги» ҳақида ёзишга қарор қилганини айтди. Қизини тарбиялаш бўйича ўз мажбуриятларини бажармагани учун боланинг онасига баённома тузилди, ўқувчининг ўзи эса профилактик ҳисобга қўйилади.

Магадан вилояти полицияси терроризмни омма олдида оқлаганликда гумонланган Ола қишлоғида яшовчи 75 ёшли фуқарони қўлга олди. Полиция томонидан ёзиб олинган видеода ҳибсга олинган эркак «аҳмоқона иш қилганини», айтганидан пушаймонлигини айтган. Унинг сўзларига кўра, мессенжерда видеога изоҳ қолдирган ҳолда «текинхўрларни кўпроқ ўлдириш керак эди», деб ёзиб, «Крокус»га ташриф буюрувчиларни шундай атаган. Пенсионерга нисбатан жиноий иш қўзғатилган, у етти йилгача озодликдан маҳрум қилиниш мумкин. Эркак қишлоғини тарк этмаслик ҳақидаги кафолат остида қўйиб юборилган.

«Крокус Сити Холл»даги теракт

Москва яқинидаги Красногорскда «Крокус Сити Холл» концерт залида теракт 22 март куни кечқурун содир бўлган, ўшанда бир неча киши концерт томошабинларига қарата ўт очди, сўнг ёнғин бошланди. Сўнгги маълумотларга кўра, теракт оқибатида 143 киши ҳалок бўлган, ўнлаб одамлар шифохоналарда.

Россия ФСБ директори Александр Бортниковнинг айтишича, «Крокус»даги терактдан сўнг 11 киши, жумладан, жиноятнинг тўғридан тўғри иштирокчиси бўлган 4 киши қўлга олинган. Россия президенти Владимир Путинга яқин бўлган Россия хавфсизлик ходимлари Украинани терактга алоқадорликда айблади. Киев воқеага алоқадорлигини рад этяпти.

Москва яқинидаги концерт залига уюштирилган ҳужум учун жавобгарликни ИШИД террорчилик гуруҳи ўз зиммасига олди. АҚШ Давлат департаменти мамлакат разведка хизматларига таяниб, бу иқрорни ҳақиқий деб билишини билдирди. “Замин” янгиликларини “Инстаграм”да кузатиб боринг