Трамп шахсий суҳбатда Қрим ва Донбассни Россияга беришини айтган

^{Фото: Reuters}
АҚШ собиқ президенти Дональд Трамп шахсий суҳбатида Қрим ва Донбассни Россияга бериш орқали Украинадаги урушни тугатиши мумкинлигини айтган. Бу ҳақда суҳбатдан хабардор манбага таяниб, Тhe Washington Post хабар берди.

Трамп бир неча бор АҚШ президенти этиб қайта сайланса, 24 соат ичида Россия ва Украина ўртасидаги уруш борасида келишувга эришишини айтганди. Аммо у мунтазам равишда режа мазмунини ошкор қилишдан бош тортган. Анонимлик шарти билан Трамп билан масалани муҳокама қилган одамлар режа Украинани Қрим ва Донбассни Россияга беришга ундаш эканини билдирди.

“Трамп суҳбатда Россия ҳам, Украина ҳам ўз юзини сақлаб қолишини ва конфликтдан чиқиш йўлини исташини айтди. Украинанинг айрим ҳудудларидаги одамлар Россиянинг бир қисми бўлишга қарши эмаслигини билдирди”, — дейди манба.

Таъкидланишича, Трампнинг баъзи ҳамкорлари уни бундай режадан қайтаришга уринган.

“Мен вақтимнинг 100 фоизини Трамп билан Украина ҳақида суҳбатлашишга сарфладим. У (Путин) товон тўлаши керак. У бу урушда юта олмайди”, — дейди республикачи сенатор Линдси Грем.

Трампнинг матбуот хизмати юқоридаги далиллар ишончли эмаслиги ҳақидаги баёнот билан чекланиб, бу маълумотни бевосита рад этишдан бош тортди.

“Президент Трампнинг режасига оид ҳар қандай тахминлар нима бўлаётгани ёки нима бўлиши ҳақида ҳеч қандай тасаввурга эга бўлмаган, номаълум манбалардан келади. Президент Трамп қотилликни тўхтатиш ҳақида гапираётган ягона одамдир”, — деди матбуот котиби Керолин Леавитт.

Трампнинг Россия бўйича собиқ бош маслаҳатчиси Фиона Хиллнинг айтишича, унинг собиқ хўжайини “ўзининг харизмасига ҳаддан ташқари таянади” ва у Украина ва Россия раҳбарлари билан музокаралар столига ўтириш орқали уларни яраштириши мумкинлигига ишонади.

У, шунингдек, Трамп жамоаси Россиянинг Украинага бостириб киришини Европа хавфсизлиги ва бутун дунё тартибига таҳдид эмас, балки“ оддий ҳудудий низо” сифатида қабул қилишини таъкидлади. “Замин” янгиликларини “Telegram”да кузатиб боринг