Байден Трампни «Ҳитлер риторикасидан» фойдаланганликда айблади

^{Фото: CHRIS DELMAS AFP via Getty Images}
АҚШ етакчиси Жо Байден ўзидан олдинги президент ва давлат раҳбари лавозимига қайта сайланиш учун номзод Доналд Трампни ижтимоий тармоғида эълон қилинган баҳсли видеоклип билан туфайли «нацистлар риторикасидан» фойдаланганликда яна айблади. Оқ уй раҳбари 21 май, сешанба куни эълон қилинган сайловолди ташвиқоти видеосида Трамп Америка эмас, «Ҳитлер тилидан» фойдаланмоқда, деди.

Видеода Байден қўлидаги телефонга қараб, видеоклип ҳақида гапиради: «Бу унинг расмий аккаунтидами? Вой». Трампни қўллаб-қувватловчи видеода у ғалаба қозонган тақдирда эълон қилинадиган газета сарлавҳалари кўрсатилган. Уларда, жумладан, иқтисодиётнинг гуллаб-яшнаши, ёпиқ чегаралар ва мамлакатнинг «бирлашган Рейх»га айланиши ҳақида сўз юритилган. Видео 21 май куни тушдан кейин Трамп томонидан яратилган Truth Social ижтимоий платформасида жойлаштирилган ва тахминан 19 соатдан кейин ўчириб ташланган.

Жо Байден, шунингдек, Бостондаги сайловолди ташвиқоти чоғида Трампни танқид қилиб, унинг иккинчи президентлик муддатидан келиб чиқадиган таҳдид биринчисидан кўра жиддийроқ эканини айтди, чунки у, Оқ уй раҳбарининг сўзларига кўра, «ақлдан озган» ва йўқотилган 2020 президентлик сайловлари учун қасосга берилиб кетган.

Трамп атрофидагиларнинг муносабати

Собиқ президентнинг яқинлари баҳсли видеоклип ўчирилганини тасдиқлашди. Трамп штаби вакилининг таъкидлашича, бу видео кампания видеоси эмас, балки «афтидан, бу сўзни пайқамаган» ходим томонидан Truth Social платформасида тарқатилган.

«Рейх» сўзи одатда Адолф Ҳитлернинг нацистлар «учинчи Рейх»и билан боғланади, бироқ бу ҳолатда у 1871 йилда Германия империясининг ташкил топишига ишора қилади, деб ёзади АҚШ ОАВ. Матн биринчи жаҳон уруши ҳақидаги Википедия мақоласидан кўчирилган кўринади.

Видеоклип аввалдан тайёрланган газета ниқоби ёрдамида яратилган бўлиб, ундан интернетдаги бошқа клипларни ҳам ёзиб олишда фойдаланилган. Ушбу видеодаги бошқа газета сарлавҳалари ҳам Биринчи жаҳон урушига ишора қилади.

Янгиликлар