Россияда Мудофаа вазирлигининг яна бир юқори мартабали ходими ҳибсга олинди

^{Фото: AP}
Суд Россия Мудофаа вазирлигининг давлат мудофаа буюртмаларини таъминлаш бўлими бошлиғи Владимир Вертелецкийни ҳибсга олди. Бу ҳақда 23 май, пайшанба куни Россия Тергов қўмитасининг расмий вакили Светлана Петренко аввалроқ ОАВда пайдо бўлган маълумотни тасдиқлаган ҳолда маълум қилди. «Терговнинг илтимосига биноан суд Вертелецкийга нисбатан қамоққа олиш тарзидаги эҳтиёт чорасини танлади», деди Петренко.

Унинг сўзларига кўра, Вертелецкий давлат мудофаа буюртмасини бажаришда мансаб ваколатини суиистеъмол қилганликда айбланган. «2022 йилда Вертелецкий давлат шартномаси бўйича қурилиш ишларининг бир қисми сифатида тугалланмаган ишларни қабул қилган, айбланувчининг ноқонуний хатти-ҳаракатлари натижасида давлатга 70 миллион рублдан ортиқ зарар етказилган», - дея қўшимча қилди тергов вакили.

Тергов қўмитасининг Вертелецкий ҳибсга олингани ҳақидаги расмий баёноти эълон қилинишидан олдин бир қатор оммавий ахборот воситалари, жумладан, «Интерфакс» агентлиги ва РЕН ТВ телеканали Мудофаа вазирлиги департаменти бошлиғи тадбиркордан уй ва автомашина шаклида пора олгани учун ҳибсга олинганини даъво қилишди. РБК маълумотларига кўра, Вертелецкий 21 май куни ушланган.

Россияда амалдорларни пора учун ҳибсга олиш тўлқини

Сўнгги пайтларда йирик миқдорда пора олганликда гумон қилинган россиялик амалдорларга қарши бир неча жиноий иш қўзғатилгани маълум бўлди. Апрел ойи охирида Россия мудофаа вазирининг ўринбосари Тимур Иванов ушбу модда бўйича, 14 майда Мудофаа вазирлиги кадрлар бўлими бошлиғи Юрий Кузнецов, 23 майда Бош штаб бошлиғининг ўринбосари генерал Вадим Шамарин, шунингдек, Федерал жазони ижро этиш хизмати (ФСИН) Москва вилояти бўйича Бош бошқармаси бошлиғининг ўринбосари Владимир Талаев ҳибсга олинган эди.

Янгиликлар