ЦАҲАЛ Филаделфия йўлагини назоратга олди

^{Фото: Mohammed Abed/AFP/Getty Images}
Исроил мудофаа кучлари (ЦАҲАЛ) Ғазо сектори ва Миср ўртасида чегарадаги 14 километрлик буфер зонаси бўлган Филаделфия коридорини «оператив назоратга олди». Бу ҳақда 29 май, чоршанба куни ЦАҲАЛ расмий вакили Даниэл Ҳагарий маълум қилди.

Ғазо сектори чегаралари бўйлаб ўтувчи Филаделфия йўлаги 1979 йилда Исроил ва Миср ўртасидаги тинчлик келишуви доирасида яратилган. Исроил армияси ундан Ғазо секторини тарк этишдан олдин патрул қилиш учун фойдаланган, деб эслатади AFP. «Исроил узоқ вақтдан бери Фаластин ҳудудидаги қуролли гуруҳлар ушбу йўлакдан қурол-яроғ олиб ўтишда фойдаланмоқда, дея гумон қилиб келади», деб ёзади нашр.

Ҳагарийнинг сўзларига кўра, Исроил ҳарбийлари Филаделфия йўлаги бўйлаб 20 га яқин туннелни аниқлаган. Ўз навбатида, Мисрнинг юқори мартабали вакили бу маълумотларни рад этди. «Исроил Фаластиннинг Рафаҳ шаҳрига қарши операцияни давом эттиришни оқлаш ва урушни сиёсий мақсадларда чўзиш учун бу айбловларга мурожаат қилмоқда», — дея AFP расмийнинг сўзларидан иқтибос келтирган. Журналистлар суҳбатдошининг исми кўрсатилмаган.

Исроил ҳарбийларининг Рафаҳдаги операцияси

Исроил мудофаа кучлари халқаро танқидларга қарамай, Ғазо сектори жанубидаги Рафаҳ шаҳрида ҳарбий амалиётларини давом эттирмоқда. ОАВ шаҳар танклардан ва ҳаводан ўққа тутилаётгани ҳақида хабар бермоқда.

Охирги уч ҳафта ичида Ғазо секторининг Миср билан чегарасида жойлашган Рафаҳ шаҳридан 1 миллионга яқин фаластинлик жанговар ҳаракатлар туфайли чиқиб кетди.

Исроил-Фаластин можароси

7 октябр куни эрталаб ҲАМАСнинг ҳарбий қаноти - «Иззаддин ал-Қассам бригадалари» Исроилга қарши «Ал-Ақсо тўфони» операцияси бошланганини эълон қилди. Ғазо секторидан Исроил томон минглаб ракеталар отилди, қуролли гуруҳлар Исроил аҳоли пунктларига кирди.

ҲАМАСнинг билдиришича, операция босиб олинган Шарқий Қуддусдаги Ал-Ақсо масжидига бостириб кириш ва исроиллик муҳожирларнинг фаластинликларга нисбатан зўравонлиги кучайиб бораётганига жавобан амалга оширилган. Бунга жавобан Исроил армияси Ғазо секторида ҲАМАСга қарши ўнлаб қирувчи самолётлардан фойдаланган ҳолда «Темир қиличлар» операцияси бошланганини эълон қилди.

Исроил-Фаластин можароси авж олгандан бери 36 мингга яқин фаластинлик ҳалок бўлди. Исроилда қурбонлар сони 1400 дан ошади. Ғазонинг 2,3 миллион аҳолиси Исроилнинг ҳаводан оммавий бомбардимон қилиши ва эксклавнинг тўлиқ блокадаси туфайли озиқ-овқат, сув ва дори-дармонлар танқислигидан азият чекмоқда.

Янгиликлар