Зеленский Франция парламентида ҳудудий ён босиш имконини рад этди

^{Фото: AP}
Киев Россия билан урушни тугатиш учун ҳудудий ён босишга тайёр эмас, чунки бундай қадам Москвага янги уруш бошланишидан олдин пауза беради. Бу ҳақда 7 июн, жума куни Украина президенти Володимир Зеленский Франция парламентида сўзлаган нутқида айтиб ўтди. Украина президентининг девони унинг нутқи акс этган видеони YouTube’да эълон қилди. Парламент зали тўлиқ тўлмаган, бироқ ҳозир бўлган депутатлар Украина давлати раҳбарини қарсаклар билан кутиб олишди.

Зеленский Украина ғалабасига ишонади

Володимир Зеленский Иккинчи жаҳон уруши даврида миллий социалистларга қарши эркин Европа учун курашган халқнинг жасоратини эслаб, Украина Россияга қарши урушда ғалаба қозонишига ишонч билдирди.

«Биз бу жангда ғалаба қозона оламизми? Албатта, ҳа. Биз буни қила оламиз. Украина, демак Европа ҳам. Мен Франция каби бунга аминман. Франция «Д куни» бўлмаганида ҳам эркинликка ишонган, лекин ўша қўниш куни Европадаги ғалаба куни каби муқаррар эди», деди Украина раҳбари.

«РФ урушда ғалаба қозона оладими? Йўқ, чунки сиз ва мен мағлуб бўлишга ҳаққимиз йўқ», деб таъкидлади Володимир Зеленский. «Бу уруш ҳозир мавжуд бўлган чизиқ бўйлаб давом этиши мумкинми? Йўқ, чунки 80 йил олдинми ёки ҳозирми, ҳеч қандай линиялар бўлиши мумкин эмас, - дея давом этди Зеленский. - Агар кимдир ўзи вақт чегараларини чизишга ҳаракат қилса, бу шунчаки янги уруш олдидан пауза беради», — дея Украина президенти нутқидан иқтибос келтиради «РБК-Украина» интернет-нашри.

Ғарбни Украинага ёрдамни кучайтиришга чақириш

Бундан ташқари, Володимир Зеленский Россия расмийлари «Европани беқарорлаштириш йўлларини қидираётганини» айтди. «Биз тажовуз Болтиқбўйи давлатлари, Полша ва Болқонга қандай тарқалаётганини аллақачон кўриб турибмиз», деди у.

Зеленский Ғарб давлатларини Украинани қўллаб-қувватлашни кучайтиришга чақирганини такрорлади: «Биз ёлғиз қолмаслигимиз керак». «Украиналик учувчилар томонидан бошқариладиган жанговар самолётингиз Европа унга таҳдид солаётган ёвузликдан кучлироқ эканлигини исботлайди», — деди Зеленский.

Володимир Зеленский Парижга Франция президенти Эммануэл Макроннинг таклифига биноан Иттифоқчилар Нормандияга қўниши 80 йиллигини нишонлаш маросимида қатнашиш учун ташриф буюрди. Россия бу тадбирга таклиф қилинмади. Бу Зеленскийнинг Россиянинг Украинага қарши уруши бошланганидан бери Парижга тўртинчи ташрифи.

Янгиликлар