Кенияда янги солиқ тизими жорий қилиниши ортидан намойишлар уюштирилди

^{Фото: Reuters}
Кенияда янги солиқ тартиботидан норози бўлган аҳоли бутун мамлакатда намойишлар бошлаб юборди. Бу ҳақда Reuters хабар берди.

Ҳозирча тартибсизликлар оқибатида 1 киши ҳалок бўлгани маълум қилинган. Мамлакатнинг турли штатларида бир неча юзлаб фуқаролар ҳибсга олинган.

Норозиликлар 20 июнь куни мамлакат пойтахтида юзага келган. Ҳукуматнинг бюджет учун қўшимча 2,7 миллиард доллар миқдорда солиқ тушуми ундиришни кўзда тутган янги тартиботи ғалаёнлар учун асос бўлган.

Пойтахт Найробидаги намойишчиларни тарқатиш учун полиция кўздан ёш оқизувчи газ ва сув пуркагичлардан фойдаланган. Amnesty International ва Кения Тиббиёт ассоциацияси ҳолат юзасидан баёнот эълон қилиб, намойишчиларни бостириш жараёнида куч ишлатар тузилмалардан зўравонликка йўл қўймасликни сўраган.

Найроби округи полицияси ҳудуд назоратга олинаётганини билдирган. Бироқ полиция қўмондони Адамсон Бунгей журналистларнинг мурожаатларини жавобсиз қолдирган.

“Биз кўпчилиги ёшлар бўлган бир неча минглаб намойишчиларнинг полиция ҳаракатига қарши вазминлик ва хушмуомалалик кўрсатганидан мамнунмиз. Муаммо тез ҳал бўлаётганидан хурсандмиз”. — дейилган полиция баёнотида.

Намойишчилар ҳукуматдан янги молиявий қонун лойиҳасидан бутунлай воз кечишини сўрамоқда. Янги қонун иқтисодиётни бўғиб қўйиши ва тирикчиликка қийналаётган кенияликларнинг яшаш шароитларини оғирлаштириши айтилган.

Халқаро валюта жамғармаси эса ҳукумат бюджет тақчиллиги ва давлат қарзини камайтириш учун даромадларни ошириши кераклигини билдирган. Кениянинг 47 округидан 19 тасида бўлиб ўтган кенг кўламли намойишларга қарамай, пайшанба куни қонунчилар молия тўғрисидаги қонун лойиҳасини иккинчи ўқишда қабул қилиб, баҳсли солиқ таклифларини тасдиқлаш учун кейинги босқичга ўтказишган. “Замин” янгиликларини “Инстаграм”да кузатиб боринг