Беларусда Германия фуқароси ўлимга ҳукм қилинди

^{Фото: Рико Крегер}
Германия ТИВ Беларусда Германия фуқароси ўлим жазосига ҳукм қилингани ҳақида хабар берди.

Беларусда экстремистик ташкилот деб тан олинган “Весна” инсон ҳуқуқлари маркази маълумотларига кўра, гап 30 ёшли Рико Кригер ҳақида кетмоқда.

Марказнинг аниқлик киритишича, немис эркак Беларусь Жиноят кодексининг олти моддаси бўйича суд қилинган. Хусусан, у уюшган гуруҳ таркибида теракт тайёрлашда айбланган. Эркак 2023 йил ноябридан бери ҳибсда сақланаётган бўлса-да, суд жараёни жорий йилнинг 6 июнь куни бошланган. Суд уни ўлимга ҳукм қилган.

Германия Ички ишлар вазирлигининг қўшимча қилишича, идора ва Германиянинг Минскдаги элчихонаси Рико Кригерга консуллик ёрдами кўрсатмоқда ва унинг манфаатлари йўлида Беларусь ҳукумати билан фаол ишламоқда. Беларусь Адлия вазирлиги маълумотга изоҳ беришдан бош тортган.

“Весна” ишнинг Кастуси Калиновский полки билан боғлиқ бўлиши мумкинлиги ҳақида хабар берган. Кастуси Калиновский — Украина армияси томонида жанг қилаётган кўнгилли ёлланма бўлинма. Беларусда у экстремистик деб тан олинган. Рико Кригернинг LinkedIn профилига кўра, у аввал Германия Қизил Хоч жамиятида фельдшер ва АҚШнинг Берлиндаги элчихонасида қуролли хавфсизлик ходими бўлиб ишлаган.

Ҳуқуқ ҳимоячиларининг сўзларига кўра, бу Беларусда ёлланма жинояти учун судланганлик бўйича биринчи ҳолатдир. Беларусь Европада ўлим жазоси ҳали ҳам қўлланиладиган ягона давлатдир. Аmnesty International хабар беришича, 2022 йилда мамлакатда бир киши қатл этилган. “Замин” янгиликларини “Одноклассники”да кузатиб боринг