Нетаньяху Ғазо бўйича музокараларда иштирок этишини тасдиқлади

Исроил бош вазири Биньямин Нетаньяху Исроил делегациясининг 15 август куни Қатар пойтахти Доҳада бўлиб ўтадиган Ғазо сектори бўйича музокараларда иштирок этишини тасдиқлади, дея хабар беради Исроил ҳукумат идораси.

“Бош вазир Биньямин Нетаньяху Исроил делегациясининг эртага Доҳага жўнаб кетишини ва музокаралар учун мандатни маъқуллади”, дейилади баёнотда.

Нетаньяхунинг офис маслаҳатчиси Дмитрий Генделманнинг Telegram’даги каналида хабар беришича, делегация таркибига “Моссад” раҳбари Давид Барнеа, Бош хавфсизлик хизмати раҳбари Ронен Бар, шунингдек, гаровга олинганларни алмашиш координатори Ницан Алон ва бош вазирнинг халқаро масалалар бўйича маслаҳатчиси Офир Фальк киради.

Аввалроқ Нетаньяхунинг идораси Қатарда бўлиб ўтадиган Ғазо бўйича йиғилишга делегация юбориш ниятини эълон қилган эди.

Миср, Қатар ҳамда АҚШ Исроил ва ҲАМАС ҳаракатини 14—15 август кунлари ўт очишни тўхтатиш бўйича музокараларни давом эттиришга чақирди. Уч мамлакат етакчилари келишувга эришиш учун якуний таклифни тақдим этишга тайёр эканлигини билдирди. “Замин” янгиликларини “Telegram”да кузатиб боринг